Thursday, September 13, 2007

بـلـوفر مـوهـيـر و حـتّـة سـيـرامـيـك




نفسي دلوقتي حالاً حد يفهمني ايه اللي بيجرا فجأة لعقولنا؟ من حوالي سنتين تلاتة كانت دماغي دي زي البلوفر الموهير : أي حاجة و كل حاجة بتعدي جنبها ... تشبُك . كل الحاجات اللي ملهاش دعوة ببعض تتستف فوق بعضها بترتيب و تناسق . أتسأل عن حاجات مر عليها سنين ، أكون لسة فكراها ..لما كنت صغيَّرة كنت انا للي بنزل أشتري الحاجات لمامي من المحلات ... من غير ورقة افضل فاكرة الحاجات و أسعارها

ايه اللي حصل بقى؟؟؟
فجأة كدة لقيت نفسي دماغي دي زي حتة السيراميك ... حُط عليها حاجة ، هوب تتزحلق ...حتى الأفكار الجميلة اللي بتخطر ف بالي فجأة ، بتروح . اضطريت انا بقى للآتي
كراسة صغيرة كدة تتحط ف الجيب ماشية بيها ف كل حتة ... أطلعها و اكتب فيها أي فكرة جت على بالي و عجبتني ، و لو كنت نسياها ، بمسك الموبايل أكتب ريمايندرز زي العبيطة

و الهيكل الخشبي الفريد اللي كان في يوم من الأيام لفَّة شيك لهدية عيد ميلادي اللي فات... جعلتُ منه صندوق منسياتي اللي ابتدا فاضي نسبياً لحد ما اتكربس فوق بعضه بشكل فعلاً مخيف ... جواه بقى الحاجات اللي انا عادة بنساها و أنا نازلة ... الكراسة المسكينة اللي بكتب فيها الرواية (محدِّش يقدر يتبأ بمواعيد نزول الوحي خالص) ، كتابين (عادة بيكونوا رواية و مجموعة قصصية أو ديوان شعر ) أصل العبدة لله من هواة ركوب الترام ، و نص الكتب اللي قريتها كلها قريتها ف الترام ... أسيب الرواية أمسك المجموعة أسيب المجموعة أمسك الديوان ، السكة طويلة بقى و ادينا بنتسلّى .و المحفظة و الموبايل و سلسلة المفاتيح ... ايه بقى؟؟؟ ايه اللي انا بفتكره يعني؟؟


"بقينا ازاي كدة؟ "

انا ف الـ 50 من عمري لو حنقيسه على القدرات الذهنية ...أمال لمّا أوصل السن دة حعمل أوضة كاملة انشاء الله احط فيها الحاجات اللي خايفة أنساها ؟ ... يا خوفي يا بدران



مـلـحـوظـة مـهـمـة جـداً فـعـلاً : أنا لسة فاكرة إن و انا صغيرة ماكنش حد بيشرب نسكافيه ف البيت غير مامي ، و انا اللي كنت بنزل أشتري البرطمان الصغير خالص دة . و كان بالظبط بـ 5.50 قرش . اللي يعرف تمنه كام دلوقتي يقوللي ، و لأننا كبرنا كلنا دلوقتي و بقينا كلنا بنشرب نسكافيه ، فأصبح البرطمان الصغير دة يادوب يكفينا 4 ايام . فبطلنا نجيبه ، و بقينا نجيب البرطمان التاني الكبير

بقينا ازاي كدة؟
كائنات درجة تالتة ، متعددة الوظائف ، ضعيفة الذاكرة ، تسكن الخرصان ، و تتغذَى على البُن


8 comments:

CoOl GuY said...

first can u let me divid my comment to 2 section scintific one and litt. one eshta :D....

First : Sc.
The reason of the great forgotten events in our brain while we are grow up is because the gray cells which is around the splits of the brain which responsible of the old memories and the permenent memories is unused while we are young fr that we remember the far far not important memories cos it been stored there but while we are young as we grown up the store of those cells being used... so they go to the temporary cells which is the pink one in the brain which remembers only for one day as it been destroyed and another cells grown up .... so we remember the far far memories but we forgot our keys and our mobile as sara do....

Second Part : litt.
أول حاجة أسمها ماما مش مامي يا سارة إحنا قدام الناس متفضحيناش ثتنياً تذكرك للأحداث و أنتي صغيرة كان بهدف تعليمي لنفسك و تذكرك لتفصيل النسكافيه يقول أنك كنتي سعيدة و ديه حاجة حلوة أما بالنسبة للهيكل الخشبي أتمنى انه يكون ذكرى سعيدة بس هل إستخدامه كمركز للمنسيات اليومية بيدل أن اللي جايبه يعتبر عبئ يومي منسي زيو زي المفاتيح و الموبايل و حيجي في يوم يتنسى خالص بس أكيد يكفيه شرف انه مع مكنونات سارة المفضلة صحيح المنسية بس المفضلة و بالنسبة للترام انتي بتحبيه عشان متدفعيش كتير صح هاهاها و على ما أعتقد أنا ممكن أكون عارف ماذا تقرئي هذه الأيام و متخفيش لما تكوني عندك 50 حتلاقي اللي حواليكي يفكرونك بما تنسيك اياه أعباء الحياة و بعدين أيه الحقد اللي على إخواتك ده حتبصلهم حتى في النسكافية؟؟؟؟!!!!
and by the way i am really thrilled cos what u know really so glad thank u

Sara Swidan said...

آه ... صح ... مظبوط ... تمام

ايه الحلاوة دي ياخواتي؟؟

ايه دة؟؟



"هو كان بيكلِّمني ف ايه؟؟ "

سمعت انا قبل كدة حكاية الخلاية الروز و الرصاصي دي... كان كلام كله ألوان جميلة و الله

Sara Swidan said...
This comment has been removed by the author.
Anonymous said...

yady el fadye7:D
No Comment Here W 7'alas

Ghadas said...

7elw awwwiiiiiii ya sara !
ma3aki 7a2 e7na momkennefteker 7agat 7asletlena men 20 sana we nensa 7agat 7aslet embare7 :S
katna waksa ! :D

Ghada Saad

Sara Swidan said...

Psycho ...

ياترى ايه اللي كان بيدور ف بالك... ما أنتِ للصدفة الغربية ، عايشة معايا في نفس البيت ... بل و نفس الأوضة...ايه؟؟ مستغربة ليه؟؟

:)

Sara Swidan said...

NightWish ...

غادة نوَّرت البلوج يل رجّالة !!

ايه دة كله ايه دة كله؟؟ غادة و عمرو يبعتوا تعليقات ف يوم واحد !!!

لا لا لا انا اكيد حد دعيلي انهاردة ...

انهاردة ...يوم ان كارت آخر فراشاتي!

شكرا يا غادة ... فرحانة بجد ان الحوار عاجبك

Anonymous said...

حلوة فى حاجات ممكن ننساها و بالذات ساعة لما نبقى عايزين نفتكره بس فى حاجة ازعجتنى جدا هى انك قولتى على الإنسان كائنات درجة تالتة,متعددة الوظائف,ضعيفة الذاكرة,تسكن الخرسان و تتغذى على البن
اولا احنا افضل الكائنات على الارض و ربنا ميزنا بالعقل و ساعات كتير النسيان بيبقى نعمى يعنى لو الإنسان مش بينس حيفضل يفتكر الحاجات اللى بتألمه و حيفضل يفتكر انه كره شخص ما فى لحظة معينة و مش حيقدر ينسى الكره او الحقد و حيفضل يكره الانسان ده او يفتكر الحاجات و اللحظات المؤلمه
اما متعددة الوظائف فا أنا عايزة اقول حاجة الاستاذ اسلام اللى بيتكلم عن العنصرية ربنا خلق الست بتعرف تعمل كذا حاجة فى نفس الوقت يعنى ممكن تعمل 3 او حتى 5 حاجات فى وقت واحد اما الراجل مابيقدرش إلا انه يعمل إلا حاجة واحدة او اثنين بالكتير يعنى زى ماكنتى بتقولى يا سارة مامتك لما بتبقى واقفة فى المطبخ بتبقى بتعمل حاجات كتير مع بعض لكن الراجل يا يقرأ الجرائد يا يتفرج على التلفزيون حاجة واحدة بس و حتلقيه مركز جدا و لو عمل حاجة تانية بتبقى حاجة ثانوية زى انه يسمع الكاسيت و هو بيسوق او ياكل و هو بيتفرج على التليفزيون