Tuesday, September 11, 2007

فهمت



دلوقتي بس فهمتُ.. إني مش أد اللي انا كنت بعمله قبل كدة ! إني كنت عمل الناس الرَضي !

لما كنت في إبتدائي كنت على الفطرة الأولى كدة ربنا هاديني ... بحَضَّر الجدول و بعمل كراسات لكل المواد ...و خير اللهم اجعله خير ، كنت بحضر الحصص كمان. كَبَرتُ شوية ، دخلتُ إعدادي...
لا لا لا كل الحاجات دي مفروضة عليَّ...
لأ ، أنا حُرَّة ّ ( الكلمة الخايبة اللي كلنا قال اية مؤمنين بيها) بطَّلت كل الحاجات دي طبعاً و حققت ذاتي و كونتُ شخصيتي و آرائي المختلفة (خالف تُعرَف طبعا ، لا آراء ولا نيلة).
لحد الجمعة اللي فاتت كنت بفخر بأعمالي الشيطانية و انجازاتي التمردية اللي قمت بيها ، لحد ما جاتني مكالمة من الشاعر و الإنسان الجميل علاء خالد بيقولّي فيها على ندوة العدد الثامن من مجلة أمكنة . " ...و حيبقى في ناس كتير يا سارة و حيقروا أجزاء من مواضيعهم و كدة ، و أحب انك تكوني موجودة يعني". ايه!

ايه ايه؟؟ ناس كتير؟ حيقروا؟ أحب تكوني موجودة؟؟
... مين معايا؟ النمرة غلط! أقرا كدة قدَّام الناس. يا نهار ابيض...دة انا مابقراش قدَّام نفسي حتى ، مافتكرش اني سمعت نفسي بقرأ قبل كدة.

و عملت أكتر من 5 بروفات مع نفسي قبل الندوة ، و كل واحدة كانت مُحبِطة أكتر من اللي قبلها. لحد ما الوقت أزف ، و لقيت بيني و بين القراية الدقايق اللي حتقرا فيهم صديقتي / و الكاتبة الجميلة مي خالد موضوعها "صندوق الآخرة"...

وقتها قُلت لنفسي" يا خيبتك التقيلة انتي كمان ، كنتي فالحة أوي تزوغي من حصص القراءة ، اتنيلي على عينيك بقى احصدي اللي زرعتيه." و تراجعت...مش حقرا خايفة بجد.

لكن علاء خالد شجعني "خايفة من ايه يا بنتي ، ما تقري عادي" و الناس اللي جم الندوة كمان كانوا مُشَجِعين جداً و لطفاء كدة و مبتسمين ، حبستَ أنفاسي ، و غطستً

أخيرا عملتها...قريت قدام الناس .

طبعا العبدة لله اتلجلجت و غَلَطت كتير ف التشكيل...لكن ربنا ستر. مش عارفة كان ممكن يجرا ايه.

محظوظة بجد انا!!

بس بعد الندوة مازعلتش من نفسي أوي اني كنت حتراجع ، لأني كل ما بفتكر طفولتي و بسترجعها ، بشوفها على انها طفولة سعيدة و شقية ، اغتنمت الوقت فيها ماضاعتش

و عرفتُ اني عمل الناس الرضي...ناس كل ذنبهم انهم كانوا أهلي و مدرسيني.


(الصورة "موشن" على فكرة ، واخدين بالكوا؟). اقروا البوست اللي تحت .

10 comments:

Psycho said...

Ela Agan o7't 3ala el wegod..
a7eeb a2olek..enk fa3ln mo7'tlefa 3an el a7'ron bi 7aaagt ketirr:D w enty 3arfa ana a2sod eh tab3an:D'' specially 2day''

w begad you need to believe in ur talent w keep goin' w maty2sesh men ay 7aga..
3ayza ashof 7agat gedida tnya ba2a!!

Islam Taha said...

awalan ya sara enty konty perfect 3ala el ro3'm eny giet met2a7'ar w kan ma3'dob 3alaya sorta but el sa3ada 3ala wegouh el nas w ro7 el sa3ada ely kanet betrafraf 7awalin el nas lama yeshoufoky 3arafny enk konty ra23a w ba3din enty dayman keda 7'ayfa from ur own creation walahy u r good, bs law konty b te7dary 7isas el kira2a bs ;) lol go a head pretty girl

حسام مراد said...

كل سنه وانتى طيبه

والامه الاسلاميه بخير وافضل حال

ورمضان كريم

اللهم اجعلنا من عتقاء شهر رمضان
سلام

Sara Swidan said...

Psycho...
إحم إحم ...شكرا يا أختي العزيزة، معندكيش فكرة دفعاتك دي ممكن تودِّني فين!!!

و بردو...مش حديكي النضارة!!!

Sara Swidan said...

Islam Taha...
جيت متأخر صح...بس مش مغضوب عليك ولا حاجة يعني!!!

شفت انت بقى السعادة بترفرف حوالين الناس ؟؟؟ كان شكلها ايه يا تري...اكيد فراشة بيضا...

شكرا على تعليقك!!

Sara Swidan said...

حسام مراد

وانت طيب و بالصحة و السلامة !

رمضان كريم!!!

Islam Taha said...

la2 farasha bida wel nas nayma bs ;) bs lama el nas betkon sa7ya beyeb2a shaklaha sara swidan ;)

Sara Swidan said...

!! :) أحــم

سلمى البنا said...

ممممممممممممممممممممم
من هنا عرفتك اول مرة يا بنت ياسارة
(مع اني مجمعتش من اول مرةعلاقة سارة سويدان اللي بتقرا في قراءات امكنة الجديدة وبين سارة وقهوتها الزيادة الا لما شفت الصورة
وحسيت انها مالوفة ليا - لحد مافهمت هي فين وامتى)
واول ماسمعتك بتقري فكرتيني بحصص القراءة في المدرسة
بس تعرفي

طريقتك في القراءة عطت احساس حلو وجو مظبوط اوي مع اللي كنتي كاتباه - مع اني كائنة بصرية تماما وبحب اقرا النصوص عشان افهمها اكتر - (واعتقد انك زيي بما انك بتحبي التصوير ) بس على ذلك نصك شدني اني اقراه
وافتكرت كمان ان علاء خالد كان حكي لي مرة عنك وعن مدونتك بس انا طبعا زهايمر ونسيت
كفاية طولت عليكي وكان المفروض اكتب ده في ميل بس اهو بقى جت كده

Sara Swidan said...

سلمى البنا...

يا بنتي وحياة ربنا أنا النص بتاع أمكنة والله "زيـــطـــنـــي" آخر ظيطة....

إللي هوة ممكن أفتح الحنفية ينزلي حد يقوللي علي أمكنة و النص ...

بجد!

و أصلاً الحاجة اللي كانت مشجعاني إني أكتب مع علاء أساساً ... إن يعني المجلة نسبياً مش معروفة أوي و مش حتفضح أوي ...

لكن الواضح إني ساذجة باين ولا إيه ... مش عارفة!!


بصي دة البلوج بتاعك .. وقت ما يعجبك إبعتي تعليقات ...

و تكون بقى طويلة ولا قصيرة ... على راحتك يا معلمة .. دة احنا طلعنا زُمُل !!!

:)