Thursday, September 13, 2007

خـــســـارة


صِّلي على جمال النبي يا مؤمن و قول يا معين


أنا ليه ماطلعتش دجالة ؟؟ و لا من مجاذيب ابو العباس و حسين ؟؟ اللي سايبين شعرهم طويل كدة . و مكحَّلين عينيهم و محنيين ايديهم ، و لابسين سِبَح طويلة جداً على صدرهم ... و ماسكين مباخر نحاسية عتيقة ، تفوح منها في البداية رائة حريق خانقة ، ما تلبث ان تزول قليلاً لتبدأ في الاستمتاع بها .
مش كان ممكن ؟

اكيد طبعاً . بس انا اللي خيِّبت أمل نفسي و دخلت الجامعة . يا سلام لو كنت مجذوب من المجاذيب دول ، بشوف شغلي بدوام العمل صح... احُط البخور و أزعق ف الناس و اضحكلهم بسناني اللي حتبقى صفرة..."صلِّي على حضرة النبي يا صبية ! " . و تبقى ريحتي انا وحشة ، لكن ريحة البخور عاملة لغوشة ع المواضيع
مش كان ممكن؟ و الله كنت حبقى مبسوطة . و كنت حبسط الناس كمان ، لأني كنت مش حلِّم فلوس و بس ، لكن كنت حعمل للناس "سبيشيال ريكويست " ... كنت حوزغ عليهم الحكم المجانية . الحكم التمام بقى . ما انا مجنونة.




انا دلوقتي دجالة ف البيت ، بخصوص موضوع البخور دة . يا سلام على متعتي وانا بولع اعواد البخور ف كل حتة ف البيت كدة و بأعداد غريبة بتسبب شبّورة على المرايات ... و اقعد أتنفِّس انا بقى . سيدي يا سيدي .

يحرم عليا شربك يا جوزة
روحي وانت طلقة مالكيشي عوزة .

مش الجماعة الهنود شغالين الله ينوَّر ...تصدير بخور هندي انما آخر مزاج... مين محتاج الحشيش ؟

يارتني كنت طلعت دجالة ولا مجذوبة ...على الاقل مكنش حد يجرؤ ييجي جنب البخور بتاعتي و يطفيها ... و ماكنش حد حيقدر يقوللي حاجة لما آجي من ولا ضهر الناس و أخضُهم ... " رب السما و الأرض شايفك يا قليل الذكر . "


خسارة

"صلوا على جمال النبي بقى " يللا

4 comments:

Islam said...

اللهم صلى علىيك يا سيدنا يا محمد وآليه و صحبه أجمعين..............
فيه أيه أنتي غاوية تحرقي دمي يا بنتي مجاذيب أيه و سبح أيه و بعدين تبقي زايهم أزاي و الدنيا تعيش أزاي و سارة مجذوبة مجنونة ماشي و متعودين عليها كده بس مجذوبة لا لا لا لا لا مينفعش عايزة تخضي الناس ماشي و على الله حد يتعرضلك بس مجاذيب أيه؟
و بعدين مهم عندهم حق في البيت يعني يموتوا مخنوقين عشان تشمي بخور بس ال spirtual atmouspear بيبقى جامد مع البخور و حكم أيه اللي توزعيها ولا على أساس خذو الحكمة من أفواه "المجاذيب" و بالنسبة للمرايا المشيعة بالبخور ...... ممكن اشفها؟؟!!!

Sara Swidan said...

احم... انت آرش ملحتي كدة ليه؟؟؟
دي أفكار ف دماغي انا يا أخي. الله! حتى الأفكار عليها حجر اليومين دول ولا ايه...


ايـــــــــه دة؟؟؟؟؟؟؟
خليك حبوب يا بابا ، كُل عيش

Sara Swidan said...
This comment has been removed by the author.
Psycho said...

Be7'or tanyyyy..
Howa Warya Waryaaaa, W Kaman Meswrahhhhhhh:@