Wednesday, September 26, 2007

تـحـضـيـر أرواح


خـبـطـتـيـن على الرِجل ، سـَقـفـتـيـن ، طرقـعـتـيـن بالـصـوابـع ...
واحد اتنين !

خـبـطـتـيـن ، سَـقـفـتـيـن ، طرقـعـتـيـن ...
اتنين خمسة !

خـبـطـتـيـن ، سَـقـفـتـيـن ، طـرقـعتـيـن ...
خمسة واحد!
...
واحد خمسة !
...
خمسة واحد !




لعبة ملهاش اسم ، كنا بنلعبها زمان جداً انا و أخواتي و جيراننا . لعبة كانت بتصيب بالملل بعد فترة مش طويلة أوي ، إلا انها كانت دقايق ممتعة جداً يالنسبالي ف بدايتها ، ...

اللعبة قائمة على الآتي ؛ نجلس جميعاً في حلقة ، و بعددنا كل شخص له رقم بداية من "واحد" .
نضرب معاً ضربتين على الأرجل ، سـقـفـتـيـن ، و نطرقع الأصابـع مرتين ثم ... بداية من الشخص الحامل لرقم "واحد" تبدأ اللعبة .
ينطق الشخص رقمه أولاً ثم رقم آخر من داخل حلقة اللعبة . مثلاً "واحد اتنين" . ثم نضرب و نـسـَفـِّق و نـطـرقـع ، و الشخص رقم "اتنين" يقول رقمه أولاً ثم رقم الآخر . مثلاً "اتنين خمسة" ... و هكذا . (مش شرط بالترتيب .. اهم حاجة تكون من الأرقام اللي جوة الدايرة )

المتعة ف اللعبة دي كانت ف اللخبطة ، كتير كنت أنسى انا رقمي كام ، و لما ييجي عليّا الدور ألاقيهم بيبصولي مـسـتـيـيـن كلامي ، و ساعات تانية كنت أقول أرقام مش موجودة أصلاً ف الحلقة . و ساعات كنت أبدأ برقم مش رقمي ... و ف أي حالة من الحالات كنت بطلع برَّة اللعبة .

لعبة جميلة ، و غامضة لكل الناس اللي واقفين حوالينا . حتى أهالينا كانوا مش فاهمين إحنا بنلعب ايه لما يسمعوا صوت الأرقام و التسقيف و الخبط على الرجلين . أكننا بنحضَّر أرواح . تخيَّلوا ، شوية أطفال قاعدين عاملين دايرة ، و عمالين يقولوا أرقام مبعثرة هما بس قادرين يفكـُّوا شفرتها.. و فجأة ننفعل و نهلل لما حد يغلط و يطلع برة اللعب .

بالنسبالي كانت (أو أصبحت دلوقتي) حاجة أشبه باستكشاف الأرواح الحاضرة ف الحلقة ، مش تحضير أرواح تانية من برَّة مش هانعوزها ف حاجة .

ازاي؟

كتير جداً لما كان الدور بيطوِّل .. نبتدي ، بروحنا الطفولية الفقيرة نسبياً للروح الرياضية ، نتضايق من بعض عشان محدِّش بيغلط ، و الدور مش عايز يخلص ، و محدِّش فينا عارف يكسب . فكانت حاجات غريبة أوي تبتدي تحصل . و تتكرر .

انا مثلاً رقمي "خمسة" ، و حد تاني رقمه "واحد" . الـ"واحد" ينادي عليَّا ..
-"واحد خمسة "
أرد انا . كنوع من أنواع الهجوم ..
-"خمسة واحد " (أنادي عليه تاني)
فيقوم الـ"واحد" يرد الهجوم ..
-"واحد خمسة "
و تتقلب ب عـِنـد . نفضل كدة كتير . لحد ما حد فينا ينسحب . رغم ان في ناس تانية لسة موجودة ف الحلقة ، و المفروض اننا نشركهم ف اللعب .

كدة كانت بـتـبـانـلـي الأرواح الهجومية ، و العنيدة ( المعنى الغبي من العند ) . كتير كنت أنا اللي أبدأ بالموضوع دة . الهجوم . و بعد فترة قصيَّرة ، بين العند و الاحساس بالذنب ناحية اللي قاعدين ساكتين بيتفرجوا علينا و ما بيلعبوش (واللي بيكون بان عليهم الزهق) ... كنت بحس اني صاحبة القرار الأصعب . أكـَمـِل عـِنـد ؟ و لا أنسحب و أنادي على اي رقم تاني عشان نكمِّل لعب ؟

مش حكدب . ساعات كنت بكمـِّل عـِنـد ، لكن لحظة ما اللي قدامي بينسحب أو بيغلط حتى ، و يخرج برة اللعب ... كنت بحس بالذنب . و مش بعرف أكمِّل الدور كويس .. ف أغلط و أخرج !

ساعات تانية .. كنت بنسحب و أكيد ماببقاش مبسوطة أوي لحظتها ، لكن أول ما يبتدي الباقيين يلعبوا و صوتنا كلنا يعلا تاني ، كنت بنسى .

دلوقتي بقى و انا بفتكر .. عرفت ان في مؤشرات عديدة كانت تـُظـهِـرلـي نفسي .. و انا ماكنتش واخدة بالي . انا الروح الهجومية العبيطة اللي تبدأ الهجوم من غير سبب . و بعد ما تتروَّط ، تفكـَّر . تحتار . تقرر .

أو تستمر .. لحد ما تغلط .

و وقتها ، بيكون دوري ف اللعبة خـَـلــَص خلاص


6 comments:

Islam said...

aih dah aih dah ya3ny enty to3ody bel ayam matektbish w lama tektiby tektiby kteer keda 2 blogs wa7ed fihom tewwwwwwwwwwil bs gameel bardo ;) 3emoman enty fanana fe3lan enek te7aweloy le3bit atfal bari2a keda l shi2 mor3b kata7dir el 2arwa7 2arwa7 aih :D 7aram 3aliky bs 3emoman ana makontsh ba7eb el le3ba dy 3ashan kanet banaty awy w kan beyda7ak 3alaya w lama kont bal3abha w 7ad ye2ol rakamy makontsh ba7'odha 3end bs kont badakin w a3melo neglecting w afdal 2a2oul ba2ay el 2arkam w e7na sha3'alin WA7ED 7'AMSA oba wa2a3 f shar a3malo ana msh ba3anid ana batala3o 3ala toul lol kolo estamta3 w i took my revenage in fair way :D hehe bs ta7dir arwa7 i think after partipating in real ta8deer arwa7 by el kobaya 2a2oulek en msh shabaha 7'aaaaaaaaaaaaaaaaaaaaaaaalis :D

Sara Swidan said...

Islam...

أكيد جرَّبت الويجا كمان ...

Islam said...

la2 b sara7a heya el kobaya bs w kanet tagriba 3;ir mo7ababa bel mara :D

Sara Swidan said...

Islam ...
بس فالح تتريق عليّا لما أقول اني كان نفسي أبقى دجَّالة!!

:)

Psycho said...

Fakrteny Belazy Madaa:D:D
Ana Fakra lama kona benl3ba fi da7'lt el 3morha w kan sotna beraan:D

Sara Swidan said...

Psycho ...

فاكرة؟؟ و كانوا الجيران يروجوا يشتكوا لمامي مننا ...

و كنا بنلعب مع الولاد و كان أكتر من واحد فيهم بيحبك ، و يحوش من مصروفه عشان يشتريلك آيس كريم مصاصة ...


فكرتيني بالذي مضى انتي كمان!!