Tuesday, September 25, 2007

مــش كـــفـــايـــة




نظراً لشيء كنت لحد فترة قريَِبة جداً فاكراه مش باين أوي ... و فجأة جاءني تـَعـَجـُـب من صديق لي من نفس الشيء ، صار واجباً عليَّ أن أعترف به لنفسي على الأقل .

حاجتين ..

لـــيـــه؟

ليه كل كـُـبــايــات و مجات العالم مش بتكفيني ؟ كل ما أدخل محل و أشوف فيه ركن مجّات ، أجري عليه زي العبيطة اتفرج عليهم واحد واحد ، و لو ما لقيتش حاجة عجبتني أوي ، أمشي و أنا متضايقة . متضايقة جداً لدرجة إني بتمنى لو ماكنتش رحت اتفرَّجت عليهم ، أو ما أخدتش بالي منهم ... أو مادخلتش المحل أصلاً . و لو لقيت مج حلو ... انبسط جداً جداً ، رغم انه مش بالضرورة أشتريه ، أرجعه مكانه و انا عيني على اللمعة بتاعته ف النور . أتخيل طعم النسكافيه فيه ... و لو مش حشتريه ، ابص عليه كويس كدة ، و أقنع نفسي أنه كبير على إيدي . و امتن جداً للحظة الخاصة اللي عشتها من التفاهم معاه .

ساعات بحس اني مجنونة !

مش بنال كفايتي أبداً ... و ياه ! يــــــــــاه لو مج من مجاتي اتكسر . أو حتى لو وقع و ماتكسرش و اتكسرت ودنه و فضل محطوط مع المجات التانية صاحب عاهة . اتمنى لو كان اتكسر كله ، كان على الأقل كان حيبقى عارف وضعه من ناحيتي . هو مج ولا كباية أقلام ، و لا كباية ملاعق شاي . ولا مجرد مج مـُـتـعــِب الشـُـرب فيه لمّا تكون باقي المجات السليمة مشغولة .

مش بس كدة .. كمان كل آنية السوائل؛ كاسات ، زهريات . كل حاجة تحوي سائل ، تديني احساس بالرفعة . بالانبهار . بالسكون .

و عمري ما اسكفيت ..


و الحاجة التانية ..
أنا ليه مكبَّرة المواضيع . بتحبي المجات؟ حـبـيـها يا ستي . مش بـتـسـتـكـفي بيها ، اشتري كمان و كمان ، مافيش حاجة حتترمى .. قالبة دماغك ليه؟ ايه دة؟ مش كدة ابداً .

أنا ماكنتش اشتكيتلك لما لاحظتُ اإن كل صوَّرك مجات ...و أبواب أو شبابيك .. ولا حاولت أفهم العلاقة بينهم .
أنا ماكنتش مستنية اعتراف منك .. انا كنت عارفة ، و مش متضايقة ، زي ما أنا عارفة حاجات كتير انتي أصلاً ماتعرفيهاش . تصتادي الحاجات الهايفة انت ِ وتعملي عليها قضايا تفصيل أكبر من مقاس دماغك و دماغي ، و ف الحاجات الكبيرة المهمة .. تستخبي منها و تجري على أي حاجة ملونة و مزركشة ... تغطي بيها على صوتي ...
وشّ وشّ وشّ وشّ ! كـــفـــايـــة ! إنت ِ سمعاني أصلاً ؟

...


أيوة ،

ساعات بحس إني مجنونة

8 comments:

e7na said...

يعنى يا ساره مش كفايه كمية الفناجين اللى فى المدونه تقومى تعملى بوست عن المجات


أيوة ،

ساعات بحس إني مجنونة

اعتراف
؟؟؟؟؟؟

Sara Swidan said...

e7na ...

اعــــــــــــــتـــــــــــــــــــــراف
و تــــــــــــــــصــــــــــــريـــــــــــــــح
و اقــــــــــــــــــــــــــــــــــــرار

Islam said...

إسمحيلي يا سارة بالنسبةللجنون فضح انتي بح خالص بس لأسباب تانية غير المذكورة فا.... ماعلينا يعني بالنسبة للمجات هو عادي اللي يعرف سارة كويس حيتعود على الموضوع ده و يمكن يحبوا فيها و ده مش جنون على فكرة يا سارة ده أسمه شغف أو كما يقول المجتمع الغربي عليه passion سارة شغوفة بالمجات و السبح و حجات تانية فا لو ده جنون يبقى يا إحنا انت مجنون بالمدونات و أنا بالكتب و غيري بالأثاث وهلم جرة فمع إختلاف المسميات كلنا مجانين و أتحدى ان قيه حد لسه عاقل أصلاً في هذا الزمان و بعدين مش عايز احلل بس مش يمكن الحاجات اللي بتحتوي السوائل دي إنعكاس لشخصية تبعث لملئ الفراغ بحنان أو بأمان أو العكس على حسب الشخصية و يمكن الإنجذاب ده راجع لحبك للقهوة فبتحبي أي شي قريب ليها و ده أنا نفسي شاكك فيه بس عموماً أنا مبسوط بجنونك الشخصي ده أحسن ميكون حاجة تانية و نيس وورك ميس سارة إت واز نيس بلوج هاهاهاهاها

Sara Swidan said...

Islam...

"مجنون .. مجنون
وجنوني باختياري "


انا مش عارفة يعني أشكرك و كدة .. ولا اعمل ايه بالظبط !

نص الكلام حلو ، و النص التاني تهزيق ..

لكن برده .. انت اسلام مننا و علينا.. و ان ما شالكش البلوج نشيلك جوة حبابي عنينا ..

إحم ..يانهاري! دة كله طلع عارف حوار المجات .. إلا انا!
جميل جداً!!

خد بالك من الكتب بتاعتك بقى ، لتروح تفتن عليك و تفضحك وسط صحابك ، زي مجاتي ما عملوا

كان بودي يا اسلام يابني أقدِّملك قهوة ، لكن معلش . أصل معندناش بن

Islam said...

lol e7's ya3ny aih mafish bon tayeb w 7ane3raf 2iza konty siet biet shatra ezay men 3'ir fengan ahwa b wish :P ha lol beside ana sayem 7'alih nescaffe

Sara Swidan said...

Islam ...

مـــــــــســــــخـــــــرة

Prozaaak said...

ليه ساعات كل حاجه نقعد نحلل ونتحلل فيها ؟
كتير اوى من الحاجات بتفقد طعماها وكل احساستها الحلوه بسبب ده

ماعت بتمارس العيبها المعتادة عشان توش دماغنا

انا بكره ماعـــت !!

Sara Swidan said...

Prozaaak ...

و أنا بضم صوتي لصوتك ...


بــــــكــــــرهــــــــهـــــــــــا !


لكن ماقددرش طول الوقت أكره صوابعي ، و وداني ، و شعري ، و مناخيري !!

ماعت جزء مني ، أو انا اللي صرت جزء منها !

فرصة جميلة يا
Prozaaak
حزور مدونتك قريب !