Sunday, October 28, 2007

جـردَل بـرتـقـانـي




بحب أنزل الشارع بدري ساعات .. بدري يعني فعلاً بدري ، الساعة 7 أو 8 ولا حاجة كدة ..
بحب أكون من أوائل الناس اللي نزلوا من بيوتهم عشان يمارسوا حياتهم .

مش دايماً طبعاً بحب أنزل كدة أقضي اليوم ف الشارع يعني . لكن على حسب الحالة النفسية ؛ لأني بيوحشني البيت على طول . و بستمتع برضه باليوم من أوله ف البيت ، لكن وأنا بعمل الحاجات التانية .. النسكافيه ، الكمبيوتر . كدة !

قبل النزول بدري كدة بكون صاحية من قبلها بحوالي ساعة و نص أو ساعتين عشان أبدأ اليوم بهدوء ، من غير سربعة و قلق .. بيبقى يوم سواد لما أصحى متأخرة عن معادي ، و أدربك الدنيا بقى و أنـُط ف هدومي و أنزل .. إيه دة ؟!

واللي بعمله من غير ما أقصد هو إني بشغَّل أغاني بحبها و أنا بجهز للنزول ... غالباً ما بتبقى هادية .. و برضة غالباً ما بتكون لناس مغمورين ..

حد مثلاً سمع عن حد إسمه :
Joshua Radin
؟؟

حد قبل كدة سمع عن باند إسمه
Wax Poetic
؟؟
أنا أصلاً معرفش أنا عرفتهم منين ...

وساعات كمان بتبقى نهاراتي مع
Norah Jonesو Diana Krall و Nat King Cole


لكن السبب الخفي ورا إللي بسمعه دة هوة إني أدي لنفسي حاجة ، أغاني ، تدور ف ودني ... لحد ما أرجع البيت تاني مثلاً !
رغم إنها مبالغة إلا إنها بتحصل ساعات ..

ممكن حد يقولي يابنتي و على إيه دة كله ؟ ما في إختراع إسمه
MP3 مثلاً
لكن لأ ... ممكن طبعاً أفضل ماشية بالسماعات ف ودني . بس إيه؟؟ وبعدين ؟؟ مين إللي حيتفاعل مع الحياة و مع الناس ؟؟ بعد ما أعزل نفسي أنا و أنطوي ، و أفضل سدَّة ودني ... و مستهينة بقدرتنا الإنسانية البسيطة و القوية جداً ف إننا نتخيَّل ، نسترجع ، نستغل عقلنا دة إللي مليان حاجات هايلة . أكيد الـ
MP3
مش هيكون متطوِّر و مستحيل و معقَّد لدرجة إنه هيغلب عقلي يعني .



و عشان أكون واضحة أكتر ... أنا لما بيحصل و بيقع ف إيدي
MP3
و أنا وسط الناس ، مش بفوِّت الفرصة .. و بحطه و بسمعه على طول .
و من غير كدب و حوارات و كلام كبير .. بتبقى متعة من نوع تاني !


مرة .. كنت نزلت بدري جداً كنت رايحة الكلية .. و برضة اتبعت نفس الحاجات اللي بعملها دي . مش فاكرة كنت بدندن إيه كدة ، و كان ماشي ع الرصيف التاني للشارع بوَّاب كدة ف إيده جردل برتقاني ... و ماشي على إيقاع سريع ، و كل عربية مركونة بيعدي عليها يخبَّط عليها 3 خبطات ... التلت خبطات مظبوطين أوي مع أيقاع شبشبه ع الأرض..

شِب شِب ، طك ، شِب شِب ، طك ، شِب شِب ، طك ... كدة !

إنبهرت طبعاً بقدرة الراجل المش طبيعية ف إنه يخرَّج الأغاني بتاعتي من دماغي ، و يخليني أمشي على نفس إيقاعه ، و أقول أنا ليه منزلتش بالشبشب عشان أمشي أشحتف و أطلع بنغمات و إيقاعات كدة ، طول الطريق للكلية ..

والله كل مرة بنزل فيها الصبح بدري كدة ، لازم أعدي فيه على حاجة كدة .. حاجة غريبة زي دي ...
بتحببني ف حياتي أكتر ، و بتحسسني إني محظوظة أكتر ..

و الله أنا ماستاهلش المعاملة إللي بعاملها لنفسي دي


ليكي يا إينو ... يا رب تكوني فهمتي اللي أنا فيه ..



الصورة : لوحة للفنان المصري عصام عزوز

25 comments:

vision said...

كنت متخيله ان كلمة يشحتف بالشبشب دى مش متداوله تسدقى نهى طلعت بتفهم يالااا مش مهم

With Myself said...

أنا بقي بنزل بدري عنك ، بعد الفجر ممكن بنص ساعة
أحلي مكان بعشقه في القاهرة في الوقت ده شط النيل في مكان معين في المنيل ، بروح هناك ومعايا ام بي ثري وافضل قاعد ساعتين علي الاقل ، او براقب القاهرة وهي بستيقظ

شعورك بالمشي في شوراع القاهرة الساعة 4 الفجر أو 5 الفجر والانتظار علي قهوة ما ومتابعة ظهور الصبح لا يوصف ..

Prozaaak said...

طبعا انا عكسك تماما ... ومش عايز اقولك انى شحت وادينت علشان اجيب موبايل جامد وذاكرته كبيره نسبيا عشان اقدر احشر فيه كل انواع المزيكا الممكنه عشان محدش ضامن ظروف موده ايه

انا فى وجه عام انسان انطوائى شويتين ومبيحبش يكون ابدا فى بؤرة الاحداث او تحت الاضواء وكاى حد بيمارس عاده معينه لفترة طويله لازم يحس بالرتابه وبيحتاج يكسر الملل ..

كان اكتر حل وسط ممكن اوصله انى انزل الشارع .. واحس ان فيه تعامل مع الناس بس فى نفس الوقت يكون المزيكا فى ودانى .. علوها وسط ميمنعش من انى اتعامل بمستوى منخفض مع المفردات اللى حوليه وفى نفس الوقت اقدر فى اى لحظة اقرر انعزل مع مزيكتى وجوانياتى

من فتره طويله فقدت اهتمامى بالناس والاحداث ووصلت انى ابتدى مشوفش الحاجات الصغيره وجمال التفاصيل والحاجات اللى بتتبعتلنا من الكون العظيم اللى حوالينا ده لكل واحد فينا بشخصه .. زى مابعتلك الراجل اللى ماشى على ايقاع الخبط والشبشب كده

اكيد المشكله فيه انا ... يمكن المترجم بتاعى باظ .. حصله شىء من العطب ... وملقتش حاجه املى بيها الفراغ الرهيب اللى حصل الا بالصوت الديجيتالى المعلب فى الشرايح الالكترونيه اللى بنمشى بيها

على فكره لازم كلنا نتعلم نلعب يوجا !!



بره اطار الموضوع :
اولا شكرا جدا على مرورك عندى ... معلش انا انتاجى اضعف مما يكون .. يمكن بوست كل تلت شهور ... ويمكن عشان كده يا ساره انا يعنى متغيب شويه ومش برد عندك باستمرار ... يعنى فى الفتره الحاليه الكلام هربان منى شويه ... بس انا متابع منتظم للبلوج بتاعتك حتى لو مكنتش بشارك .. بس البوست اول مابينزل يمكن اكون انا اول واحد بيقراه بعدك :)
مدونتك عجبانى بجد يبنتى من غير اى مجاملات ولا حفلطه فارغه ... يمكن عشان ان كل بوست بتكتبيه بيطلع نمانم صغيره كده بتبقى مستخبيه فى جحور جوه واحد فينا ... يمكن اكتر الوقت بنبقى نسينا انها موجوده اساسا
عشان كده عجبانى اكتر من مدونات كتير بتبقى مليانه باستعراض وفرد عضلات وكلام شكله حلو اوى بس مافيهوش اى روح من جواه ..

يمكن انتى اخر التفاصيل الصغيره اللى لسه قادر احس بيها
فبجد شكرا ليكى يا ساره :)

Sara Swidan said...

camera_girl ...

يا بمتي أنا عايزة أقولك إن شحتفة دي كلمة ...يانهاري ..
أنا لما كتبتها كدة كنت مش واخدة بالي. بعد ما قريت البوست تاني ، لاقيتها كلمة طالعة مسخرة ...

إيه دة؟
بس هية كلمة درجة يعني إن الواحد يمشي يشحتف يعني!! :)


لكن هي مين نهى؟؟

نوَّرتيني وحياة ربنا

Sara Swidan said...

With Myself...

أنا بخاف من ضلمة الفجر .. ضلمة الليل بحس إنها عادية ، بس ضلمة الفجر بخاف منها ..

إحم..

إنت محتاج تيجي إسكندرية بالظبط شهر ، و صدقني مش حتحتاج تروح تتفرج ع النيل تاني ، مش حتحس إنه حلو أصلاً...


إنت اختفيت في و ظهرت تاني؟

Sara Swidan said...

Prozaaak ...

أنا افتكرتك دخلت السجن ولا حاجة ..

حمد الله على سلامتك !!


معاك ف كل كلمة قلتها وحياة ربنا ، بس بذمتك ... لو حصل أي حاجة ، زي البطارية لما تقع ولا أي حاجة ، قاعد ف لجنة امتحان مثلاً . مش بتبقى حاسس انك متضايق عشان مافيش مزيكا ؟؟
مش حاسس بالاستعباد .. رغم إنها مبالغة شوية كدة ؟؟:)


فين؟؟
فين فضيلة الاستغناء يا عزيزي ؟؟


طب والله افتقدت تعليقاتك

قبل الطوفان said...

البعض يسير وفق إيقاع الحياة.. البعض الآخر يصنعه إيقاعه الخاص، تماماً مثل هذا الرجل العابر بجوار السيارات في شارع لا يحمل اسماً

لاحظت أن كثيرين يحاولون الاحتماء بالأغنيات والموسيقى من قسوة الواقع في الشارع وبلادة الشخصيات التي قد نلتقيها رغماً عنا

لكن المهم ألا ندخل في قوقعتنا، وندمن البقاء فيها فلا نعرف كيف نخرج منها، حين نريد

Eno said...

شوفتي بقا ياساره حسيتي انك بتيجي عليكي كتيررر اووووي وانتي مش تستاهلي منك كده البوست حلوه وعثول اوووي الراجل بتاع شب شب طك . شب شب طك
ههههههههههههههههههههههههههههههه

With Myself said...

ضلمة الفجر يا سارة بتستمر نص ساعة بس ، بعدها الجو بيبدأ يفّتح ، عشان كده أنا بنزل بعد الفجر بنص ساعة

طبعاً إسكندرية لا مثيل لها بين مدن مصر في طباع معينة ، وأنا من كبار عشاقها ، وخصوصاً في الشتا ، لكن برضه القاهرة لها طابع مميز ، خصوصاً وسط البلد وشوارعها

الفرق ما بين القاهرة والإسكندرية هو المركزية ، القاهرة مركزية بشكل كبير علي عكس الإسكندرية ، جربي أما تنزلي القاهرة تجربي التمسية اللي أنا بقولك عليها ولو خايفة أنا عازمك :P

أنا ما اختفيتش ، بالعكس أنا موجود ، وموجود بشدة :)

CoOl GuY said...

men na7yet enty medala3a nafsik dih true:D w mesh 7armaha men 7aga :D w men na7yet sa7ayanik el sob7 fa entyb tes7y badry this is true bs betmany el 3asr :D w men na7yet el fadayan fa enty fadya w dah true 3ashan enty shaklik 3ayza te3idy el sana b 2ilet el mozakra dy w dah true bardo

خيرالدين said...

مش فلسفه والله بس فعلا باحس ان الmp3بيسبب انفصال عن الناس وهم مش ناقصين اساسا


سلامتك من الخوف
بس ده شىء صحى على فكره

Foxology said...

لا تعليق بجد عشان مفيش تعليق على الكلام ده غير انه . ... مش عارف مفيش كلام ف دماغى بس هو حلو اوى خصوصا الجزئية اللى قولتى فيها ليه نستهين بقدرات عقولنا ف الأسترجاع والتذكر عجبتنى اوى الجزئية دى

سلامز :)

Sara Swidan said...

Yasser_best...

كلامك حلو ..

إيه دة أسلوبك حلو جداً !!


أنا اتشرَّفت بتعليقك انهاردة با ياسر...


بجد وحياة ربنا

Sara Swidan said...

Eno...

أنا من ساعتها خايفة أنزل بالشبشب لحسن أطلع بألحان و إيقاعات أنسجم معاها ...

الناس اللي ف الشارع يطلبولي الاسعاف انشاء الله

:)

نوَّرتي يا سكرة
حسميكي سكرة

Sara Swidan said...

With Myself...

طبعاً معاك ..

القاهرة و اسكندرية مختلفين تماماً . زي الست والراجل مثلاً .. مافيش مقارنة .
أو زي اتنين ستات (أصل اسكندرية متنفعش تبقى راجل خالص) و كل واحدة نوع مخلتف ..

Diffrent Types

لأ برضة أخاف ...
يجيلي اكتئاب ممكن يجيلي كدة و احنا الصبح حرفياً ... لكن الدنيا لسة ضلمة ..

إيه هو ؟ اليوم بيستعبط و مش عايز يطلع مثلاً؟؟

:)

نوَّرتني

Sara Swidan said...

Islam ...

إيه سؤال الـ
True of False
اللي دخل عليا كدة و أنا قاعدة؟؟


من ناحية موضوع الدلع دة ...ف انت ممكن تكون ماقرتش الموضوع كويس أو كدة ... معقول الموضوع دة بيعكس أي حاجة ف شخصية واحدة "مدلعة" نفسها؟؟

مش عارفة بصراحة ..

من ناحية الصحيان بدري ومتأخر و و الفاضية و المليانة ...

دي حاجات يعني ... مش عارفة ... نسبية باين .. ما كانش دة اللي أقصده ف البوست خالص يا إسلام ...

مابقاش تغيب عليا ...

اتفضل كمِّل ... قهوتك

يللا

Sara Swidan said...

e7na...

طب و إيه العمل يا أحمد ..
لما تشوف واحد ماشي بالسماعات ف ودنه .. شدهاله .. و اضربه ...

و أنا كمان حعمل كدة ...
و نتقابل ف أوسع تخشيبة انشاء الله ...

حتبقى فرصة أكيد سعيدة يابني..

أنشانتيه شيري !


والله بفرح لما بشوف تعليقاتك

Sara Swidan said...

Foxology...

شكراً يابني ربنا يخليك...


مبسوطة إنه عجبك ، من غير ما تسأل أسئلة !!:)


نوَّرتني ، و مليت الفنجان مرح

Eno said...

مرسي خالص ياساره ياقمرايه علي اللقب

ومرسي اكتر ان نورتي مدونتي
هستناكي تاني :)

سلام

Anonymous said...

el mazika goz2 la yetgz2 fi 7aytna..without it..no meaning begad specially nas keda mo3yana..

nice post ya bet..

اسامة يس said...

انا عجبني في البسوت روح الكلام .. القدرة على ايصال المعنى... او بمعنى ادق حين فرغت من قراءته شعرت ان هناك مذاقاً للتفاصيل الكامنه فيه....
دمت بكل ود...
خالص تحياتي

alzaher said...

على فكرة
هل لاحظتي أن الصورة المصاحبة لموضوعك هي لعازف عماني؟

Sara Swidan said...

Psycho...

بحبك وانتِ واعظة كدة و بتقولي كلام كبير


نوَّرتيني

Sara Swidan said...

osama...

شكراً يا أسامة ع الكلام الجميل ...

مستنية تعليقاتك

:)

Sara Swidan said...

alzaher ...


صحيح؟؟


عرفت إزاي.. من العمَّة ؟؟

هي لوحة جميلو و كلها ألوان و تفاصيل

بحبها جداً ...



انت دايماً يا عمرو عندك معلومة مهمة ... تقولهالي ..

ف كل وقت !!

:)

نوَّرتني