Tuesday, October 23, 2007

وجـود افـتـراضـي



قاعدة ف الكافيه بتلفت حوليا .. يمين و شمال و ورا .

"مالك يا بنتي ؟ إنتي هربانة من حد ولا إيه؟؟"

أنا كنت ف انتظارك .

تمر نص ساعة ، و يتبقالي نص ساعة قبل ما أمشي ، أبص ف الموبايل ، أتأكد إنك اتصلت تقولي إنك جي ... أشك أحسن أكون دخلت مرحلة تخيل حاجات مش حقيقية .

" إنتي مش كان حد حايجيلك ؟ وقع ف بلاعة ف الطريق ولا إيه؟؟"

يهزروا البنات صحابي . أضحك ... مما يقول إني بدأت تقريباً أتعود على كدة .
مش زعلانة ، و لا فرحانة طايرة ... عادي يعني .


أفتكر مرة كنا أنا و أنت و واحد صاحبك قاعدين بنتكلم ، و لاقيتك بتقوله : "أكتر حاجة حتلاقيها ف سارة هي إن كل حاجة عندها عادي .. تقولـَّها إنك حاسس إنك عندك شيزوفرانيا ، و تعترفلها إنك عندك فوبيا المرتفعات... (زي ما قلتلي إنت) . حتبتسم و تقولـَّك الله! دة أكبر دليل على إنك إنسان حقيقي ، عشان الانسان كائن بيتفاعل مع كل اللي حواليه ، و إن الانسان اللي معندوش مخاوف ، أكيد أكيد ناقصه حاجة ، فاتته حاجة ف التواصل مع اللي بيحصل حواليه . أكيد إنسان من درجة أقل..."
و دة فعلاً اللي أنا قلته .. أكيد يعني أنا اللي قلته . مش فاكرة !


أفتكر و أنا قاعدة كمان حوار بيني و بين أختي .. لما سألتني عن رأيي ف واحدة صاحبتنا كدة .. قلتلها إنها جميلة يعني عسولة . عوجت شفايفها و دورت وشها ، و قالتلي "إنتي كل الناس عندك جميلة و عسولة خالص يعني كدة على طول؟؟"

الوقت بيجري و فاضل دقايق أحاسب فيهم ، عشان ألحق أمشي .. و أنت لسة ماجتش ، و أنا لسة بتلفت حواليا . لسة هربانة .


أنت مش موجود أوي ف حياتي ..

لكن وجودك الفقير ، بيفتح شبابيك ف عـقـلـي ، بشوف حاجات ، مش جميلة و مش وحشة ، حاجات عادية .. لكن بعيش معاها لحظات مسروقة من الحياة ..

و لما بتحضر ، زي ما حضرت يومها .. بـتـتـقـفـل الشبابيك ، و بلاقي نفسي واقفة على الأرض .. و اللي أنا لاحـظـتـه إني بحس إني عايزة أنام .


بتحضر ... افتراضيا .
بتحضر بالحاجات دي .. بالشبابيك


أشك إنك تقصد دة ..
لكن هوة دة اللي حاصل

حياتي مليانة حاجات اكتشفها و افتكرها و امتصها ... نظريات و فلسفات بطلع بيها كدة ف لحظة ... وانت مش موجود.

و دة ف حد ذاته حاجة مش كويسة طبعاً ، لكن مش وحشة أوي برده




(الصورة ... أختي دايماً لما تستعمل الملاعق ، تحطها ع الحوض مش جواه .
أختي مش ف المطبخ ، لكن وجود المعلقة بالوضع دة ، علامة "أميرة مرِّت من هنا" .. )

أنا آسفة لو شكل الصورة غبي أو مش باينة أوي العلاقة بينها و بين الكلام يا "على باب الله" !!
أظن كدة وضحت شوية باين

36 comments:

على باب الله said...

معلش في سؤال واحد بس

هو أيه علاقة الملعقة اللي علي الحوض بالبوست ؟؟

نقبل جميع أنواع التفسيرات-

With Myself said...

كالعادة تعليق لا جدوي منه إلا الإشادة يتوحدك مع الكلمة ..

Sara Swidan said...

على باب الله ...

أنا وضحتها خلاص يا باشا!!
هي فعلاً مش باينة خالص ...العلاقة يعني.

بس خلاص بينتها تقريباً

Sara Swidan said...

With Myself ...

صحيح؟؟ إنت حاسس بكدة ؟؟

يا رب يكون دة مظبوط بجد ... حبقى سعيدة بجد .
ميرسي جداً على الكلام الجميل..

شكراً على التعليقات الكتيرة دي كلها وحياة ربنا

...

Islam said...

مرة إتقلي أن الكتابات مجرد كتابات حتى لو كان ليها علاقة بالواقع هي مجرد... كتابات مش عايزة تعليق ولا إستفسار ......عشان اللي بيكتب بيكتب عشان عايز يكتب فيا ترى مطلوب من أعلق؟؟؟!!!!

yomna said...

عيب انك تسميكي قهوة زيادة
انتى قهوة مظبوطة جدا

بجد بجد كلامك حلو اوى ماشاء الله و كل اللي فيه مظبوط

غيري الاسم بقى :D

Sara Swidan said...

Islam ...

إنت اتفرَّجت على فيلم عمارة يعقوبيان؟؟

كان في مشهد كدة ، راح فيه الحج عزام لـ كمال الفولي عشان يمسكه حاجة ف مجلس الشعب ...
كمال الفولي رسمله أرنب ع الورقة ..
عزام قاله : بس كدة كتير أوي يا كمال باشا !
كمال رد عليه : أنا قصدي على الرسم . إيه رأيك ف الرسم؟


استناداً للمشهد دة ... أنا ممكن أسألك : إيه رأيك ف العمل نفسه؟؟ :)

كفاية إنك اهتميت إنك تعرَّفني إنك قريته ..

نوَّرت يا سمسم
:)

Sara Swidan said...

yomna...

أول ما شفت تعليقك .. اتخضيت كدة .. بحسب في بلوج تاني إسمه قهوة زيادة قبلي ولا حاجة ...

سيِّبتي ركبي منك لله!!

ميرسي يا يمنى على الكلام الجميل وحياة رنا ... مبسوطة جداً .. بنبسط كل ما بشوف إسم حد جديد عليا باعت تعليق ..


يا رب تكون بقيت الحاجات عجباكي ...

(أنا قهوتي زيادة .. بالنسبالي القهوة المظبوطة رجالي شوية أو كدة )

مش عارفة.. خشنة.

شكراً على تعليقك اللذيذ أوي دة

مريم said...

بعترض ع الاسم
انا اول مرة اجى بس بعترض على اعتراض يمنى
القهوة الزيادة بنها وسكرها ونكهتها المكثفة واللذيذة تشبه كلامك المكثف اللذيذ جدا
شكلنا هنبقى اصحاب
انا كمان قهوتى زيادة
سلام

رئيس جمهوريه نفسى said...

رغم انى البوست ماليان لخبطه وتحسى انى انسان فى حاله غضب تاهت على لسانه الكلمات بس البوست عجبنى جدا

Sara Swidan said...

مريم ...

صديقتي الجديدة ... ميسري ع الكلام الجميل وحياة ربنا !

إنشاء الله ف يوم من الأيام نقعد و نشرب قهوة زيادة و نرغي مع بعض...

بحب إسم مريم جداً ... إسم كدة ... مليان. تقيل كدة !


فرصة جميلة يا مريم و شكراً جداً على اهتمامك

Sara Swidan said...

رئيس جمهوريه نفسى...

حالة غضب؟؟

أنا كنت عارفة إني بخبي حاجات على نفسي..

بجد وصلك غضب من البوست؟؟؟

هايل!!

أول ما تكتشف حاجة من اللي أنا بكتبه ، قللي على طول ... افضحني قدام نفسي!!


شكراً جزيلاً يا سيادة الرئيس ..

شرَّفتني تعليقاتك وحياة ربنا

...

محروس said...

القهوه الزياده احسن من الساده

كلام جميل

Foxology said...

اولا البوست حلوة اووووى معبرة اوى

ثانيا الصورة ليها علاقة وثيقة بالبوست (وده اللى انا فهمته لما خلصت قراية البوست) فعلا فى حاجات وجودها بيدل على اثر ناس اتسببو فى وجود الحاجة دى حتى لو كانو الناس دول مش موجودين حالا

ثالثا البوست فكرتنى بأغنية (شبابيك) لمنير مش عارف ليه يمكن عشان قلتى شبابيك كتيرة فى البوست

رابعا واخيرا شكرا على الخواطر دى ومتزعليش من الوجود الفقير عشان احيانا وكتير بيبقى اثره ايجابى اكتر منه سلبى

لك تحياتى من وسط السحابة السوداء :)

Islam said...

هاهاهاها حالة غضب و نكهة حلوة و ثرثرة مريمية كلام جميل جداً...... عموماً أنتي عارفة رأيي في كتاباتك لاذعة ب محبوبة تغريكي إنك تسرقي نفسك من نفسك شوية و تروحي لعالم سارة سويدان هي الـ..... مسيطرة يمكن أو حاجة تانية يمكن..... وحياة ربنا ;)

Psycho said...

loooool:D
lildragdy ya sara ana ma2sra feky ya 7abebty:D
w ba3deen ana ba7ot el ma3l2 gowa el 7od 3ala tool ya kadaba:D

fahmet madmon kalemak ba3ed 3an el ma3l2 w el shewak
estmery ya o7'tah

Psycho said...

Naset a2olek !!
7elw el look el gedid eli 3amlteh fi blog

e7na said...

بالرغم من كسلك الواضح فى الايام الاخيره
الا ان بوستاتك تغفر ذلك

الكابتن يستفسر عن سر الغياب

مـخـطـوبـه said...

من قراءتى لفنجانك الاخير احب اقول لك ان
"عادى"
بتحرمك من متعة لمس مشاعر حلوه و وحشه جواكى .. لمسها من قريب اوى.. تجاه الحاجات العاديه و المش عاديه
بشوف ان "عادى" مش بتحقق نظرية التقبل و التفاعل مع الحياه .. انتى كده عامله زى المعلقه بتاعت أميره


أميره :)

Black & Ankh said...

المعلقه كيان جامد لكنه مسبب اساسي

للحركه (التقليب,الغرف,للاكل)وجود

المعلقه على الحوض معناه ان الجماد

الغير متحرك المسبب للاضطراب علي وشك

انه يتغسل و يخرج من الحياه....و ما اشربش شاي و السلام.

معلش اصل التدوينه عجبتني , ومش عايز حد يسال على المعلقه

Bahz Baih said...

انا عديت من هنا.. أهوه سبت تعليق
بس عايز أسأل
ليه ممكن الواحد يستهلك وقته فى كل ما هو عادى

Sara Swidan said...

محروس ...

دة صحيح بالنسبالي و بالنسبة لك . لكن برضة ، موضوع نسبي !

كلام مش لذيذ .. ايه دة؟؟

نوَّرت يا محروس

Sara Swidan said...

Foxology ...

نبيه يا واد ... فهمت علاقة اصورة بالكلام .
أنا بعد ما حطيت البوست قعدت أقول إيه الصورة دي؟ مين اللي حطها؟؟

:)

مش زعلانة من الوجود الفقير طبعاً ، أصله لو كان غني ، ماكنش وماني كتبت البوست دة ، و مكانش زمانك قلت عليه تعليق .. و كان زمانك حرمتني من احساسي بوجودك يا فوكسو.. ز كان زمان نفسيتي باظت ، و أحلامي اتحطمت..

الحمد لله على كل حال!!

:)

بفرح وحياة ربنا ب تعليقاتك يا فوكس

...

Sara Swidan said...

أنا حسة إني هبلة برده إني أضيع لحظات حيوية و حقيقية ، ف إني أروح العالم الزحمة دة اللي انت بتقول عليه يا إسلام..


أو أنا حسة إني هبلة عشان مافهمتش تعليقك كويس ..

مش عارفة
وحياة ربنا...
:)

Sara Swidan said...

Psycho ...

ماشي يا أميرة .. يعني في حد غريب ف المغارة بيحط الملاعق على الحوض بعدك؟؟

نبقى نتعرف عليه مع بعض!!

أنا غلطانة إني دخلتك عالم الشهرة من أوسع أبوابه.. جاتك خيبة..

أخـــيـــراً حـــد أخــــد بـــالـــه مــن الــشـــكـــل الـــجـــديـــد للـــقــهـــوة..

طول عمري بقول عليكي نبيهة يا نيونيو

:)

Sara Swidan said...

e7na...

أنا أسفة يا أحمد!!!

بجد..

يمكن عشان عندي إمتحانات يوم 9 .. و مش بذاكر ...فبالتالي وقتي كله ضايع ف تأنيب الضمير...


أنا أسفة و الله ... لما أقى أتدلَّع و أتأخر ف بوسات جديدة ، نبهني على طول بجد..

شرَّفت القهوة يا كابتن
:)

Sara Swidan said...

مـخـطـوبـه...

يا نهارك أبيض...

كلامك صح يا نهار أبيض !

تفتكري إني بقول "عادي عادي" لكن أنا حقيقةً مش كدة ؟

ولا... أنا مش بتواصل مع الحياة؟؟



خوِّفتيني من نفسي

بجد التعليقات دي بتكشفلي حاجات ف نفسي أنا معرفهاش ..

Sara Swidan said...

Black & Ankh ...

و عجبك الحوض كمان؟؟

:)



شكراً يا عنخ.. لكن عايزة أقولك على حاجة .
المعلقة دي يحديداً .. مش معلقة شاي..

لكن أنا فاهمة إنت تقصد إيه!!

:)
شرَّفتني بتعليقك

Sara Swidan said...

Bahz Baih...

والله يا بهظ إنت معندكش فكرة أد إيه اهتامامكوا بالتعليق ع الحاجات بيهمني أد إيه ...

بيخليني بجد أهتم زيادة باللي أنا بكتبه عشان في ناس مـــهـــمــيــن زيَّك يا معلم هيقروه.. وحياة ربنا !

شكراً على تعليقك يا بهظ كمان ..


بس أنا مش فاهمه قصدك ..

قصدك إني ليه بستهلك وقتي ف كل حاجة ، خصوصاً إن كل حاجة عندي عادي؟؟
ولا إيه؟


...

مبسوطة جداً إني قابلتك أول امبارح يا واد ..
يا رب يكون انطباعك كاتغيَّرش زي ما قلت!! :)

بس خلاص

Sara Swidan said...

Bahz Baih...

والله يا بهظ إنت معندكش فكرة أد إيه اهتامامكوا بالتعليق ع الحاجات بيهمني أد إيه ...

بيخليني بجد أهتم زيادة باللي أنا بكتبه عشان في ناس مـــهـــمــيــن زيَّك يا معلم هيقروه.. وحياة ربنا !

شكراً على تعليقك يا بهظ كمان ..


بس أنا مش فاهمه قصدك ..

قصدك إني ليه بستهلك وقتي ف كل حاجة ، خصوصاً إن كل حاجة عندي عادي؟؟
ولا إيه؟


...

مبسوطة جداً إني قابلتك أول امبارح يا واد ..
يا رب يكون انطباعك كاتغيَّرش زي ما قلت!! :)

بس خلاص

Foxology said...

ياستى كف الله الشر على احلامك اللى تتحطم ونفسويتك اللى تبوظ :)


ربنا يخليكى انا اللى ببقى مبسوط لما بقرالك بوستات وتعليقاتى تعجبك :)

ربنا معاكى وفى انتظار المزيد :)

camera_girl said...

عجبتنى مدونتك اوىىىىىىىى ليها طعم مميز هنتابعك بأه

Sara Swidan said...

Foxology ...

إيدك معانا يا معلم!!

:)

Sara Swidan said...

camera_girl ...

ربنا يخليكي .. شكراً . أنا ليا الشرف إنك تتابعيني.
يا رب مخذلكيش بس!

إسمك حلو

اتفضلي كملي قهوتك

:)

alzaher said...

جميلة
فكرة الإنتظار في شكل جديد
كملي عليها

TheGrace website / موقع النعمة said...

Warm welcome to Alnemat TheGrace Arabic Christian Internet Magazine, We love you! Please visit us at:

In TheGrace opportunity to meet Jesus the Savior / في النعمة فرصة للقاء المُخلِّص يسوع المسيح
http://www.TheGrace.net

Salvation pardon peace life certitude mercy in Jesus / خلاص غفران سلام حياة يقين رحمة في المسيح
http://www.TheGrace.org

Arabic Christian Magazine The Grace offering the Arabic Bible / النعمة تقدم الإنجيل الكتاب المقدس
http://www.TheGrace.com

نتمنى لكم الفرح والسلام والمحبة لأن السلام افضل من الحرب والمحبة افضل من الكراهية كما ان النور أفضل من الظلمة
سلام لكم في محبة الله.نتأمل زياراتكم الكريمة لموقع النعمة موقع مجلة النعمة يقدم كلمة الله الكتاب المقدس الإنجيل رسالة السيد يسوع المسيح قراءات مختارة مواضيع مصيرية قصص واقعية شهادات شخصية ترانيم ممتازة ردود مؤكدة كتب بنّاءة رسوم تسالي تأملات يوميات
Bible audio Read search in Arabic Studys Stories Testimonies Hymns and Poems Answers Books Links Daily devotions Acappella Music Graphics /
Alnemat Journal Arabe Chrétien La Grâce la Revue Arabe sur Internet offre La Sainte Bible Al-Injil L’Evangile de Jésus Christ gratuit, Bienvenue a La Grâce.