Sunday, October 28, 2007

المج مش تقيل عليا ماتخافيش




كل ما حاجة بتتصلَّح ، حاجة تانية قصادها بتبوظ ..

أول ما اكتشفت إني خلاص اتخلصت من داء اللماضة و الجدال الفارغ ، و بقيت ف أي مناقشة ، أول ما أسمع صوت اختلاف ف الآراء .. بسكـُت . مع الوقت بـقيـت ف أي مناقشة بعرض رأيي ... و حتى لو مافيش اختلاف ف الآراء ، بسكـُت . بالتدريج الحوارات بتموت بسرعة ، و تتغير ...

كل ما بخف من حاجة ، حاجة تانية قصادها بتتعب ..

إيدي الشمال مرة وقع عليها حاجة ، و اتعوَّرت .. ف الأول ماحستش ، ملاحظتش إلا لما شفت دم كتير كدة على ضهر إيدي "إيه دة ؟ أنا كدة هدومي هتتوسخ !" و حطيت عليها برفان و سبتها ، و فضلت بقيت اليوم أطل عليها كل شوية ...و لاقيتها مش بتبطل تنزل دم . سبتها بقى .. هو أنا فاضيالها يعني؟؟ و لوحدها لقيتها بـطـَّلِت .. و كانت على ضهر إيدي ف حتة البلستر مش حيثبت عليها . ف طنشتها خالص بعد كدة . أخدت وقتها ، و راحت ! لكن قبل ما تختفي بالكامل ...

إيدي اليمين ساعات بتهيِّس ، لوحداها كدة توجعني ، و لوحدها برده بتخف .. كل اللي بعمله ف الأول هي متابعتها ، و ف الآخر تجاهلها ، اختبار طول نفسها فـفـرض ألمها عليا .. و أكيد ف الآخر بتتيأس مني ، و تخف .

إيدي اليمين ، ف نفس الحتة اللي إتعوَّرت فيها إيدي شمال ... إتلسعت . و كله عارف إن اللسعة بتطوِّل شوية أكتر من التعويرة . حطيت مرهم و بتاع اتباعاً لارشادات مامي و أنا عارفة تماماً إن المرهم بيخليها تحرق أكتر .. حطيت مرة و خلاص ..

لسة مختفية من كام يوم بس.. بس قبل ما تختفي ..

إيدي الشمال من كام يوم ..ف إصبع الوسطي على جنب ، اتلسعت و أنا بوَلع الكبريت. أو بمعنى أصح الحادثة كانت إن الكبريت انطفى ف صباعي ..
كانت سيئة طبعاً ... لكن رغم وجود العلامة لحد دلوقتي ، إلا أني مش منزعجة أوي منها .. لأنها كانت شايلة نفسها عني ... ماحستش أبداً بأي انزعاج من ناحيتها بالخواتم ، أو و أنا بمسك المج بالسبابة و الوسطى بس ، و اللي بيخليها بالظبط تحت وزن المج . لما بكون سرحانة ف محاضرة ولا ف سينما ولا حتة دلوقتي قدام الكمبيوتر ، بمرر صباعي السبابة من نفس الإيد عليها، و بلاقيها بتستجيب ..


أنا كنت فاكرة إني اتخلَّصت من عادة الكلام الكتير ... لكن أنا بخبي حاجات على نفسي أنا عارفة . عشان كدة أنا أصلاً عملت البلوج دة .

لكن الحقيقة ..
اللي أنا عايزة أقوله ليا هوة إن أنا مش دلوعة .. مش أول ما أتخربش أجري و أسرَّخ إلحقوني .
ف ياريت يا سارة تبطلي تجبريني على تجاهلك ، و تتعايشي معايا.. عشان أنا مش بحب الحاجات لما بتطوِّل .. و دمها بيتقل ..

أي حاجة ..


أنا عندي امتحانات قريب .. ف شدي حيلك كدة عشان نعدي بسلام احنا الاتنين .


إهداء للكابتن أحمد .. أنا آسفة إني بكسل ، بس والله ....
معنديش أعذار ..

ملحوظة يا سارة برده : مابحبش الأعذار !

بس خلاص

12 comments:

Eno said...

اولا : " كل حاجه بتتصلح ، حاجه تانيه بتبوظ "
انا معاكي جدا في دي لاني بتحصلي كتير اووووي في حاجات قريبه مني !! بس ارجع واقول اني ربنا خلي كل حاجه في الدنيا تاخد وقتها وتروح


ثانيا : الف سلامه عليكي ياقمرايه كل دي حوادث ماهو دايما البنانيت الحلوين كده حوادثهم كتيره بالذات لما بقا في المطبخ ولسه بتتعلم تعمل ايه في ايه بس انا فاهمه قصدك من الحكايات اللي حكيتيها عن الواوات دي :)


ثالثا : وده الاهم علي فكره انا قريتلك كذا بوست بحس فيه انك مش متصالحه مع نفسك !! ا
السؤال بقا هو انتي مش بتحبيكي ولا ايه !!!؟؟؟

علي فكره كل الناس بيحبوكي ماشاء الله انا مش بحسد وكمان انا بقيت واحده زيهم عجبها مدونتك وكلامك جدا
يمكن ده اول كومنت اسيبه لكن مش الاخير ان شاء الله


رابعا : عاوزه اقولك اني مبسوطه اوووي انك اسكندرانيه خصوصا بقا والصور التحفه اللي بتحوطيها خاصه بالبحر عندكم انا بعشق القاعده اللي الناس قاعدينها دي في الصوره ولما باجي مش بنزل شواطئ علي قد مابقعد كده بحس اني الدنيا ملكي وانا قاعده كده وسرحانه في البحر

ابقي بقا حوطي صور من دي كتيررر عشان فعلا البحر بيوحشني :)


انا بشكرك علي المدونه السكر دي بجد هي فعلا سكرها زياده وانا مبسوطه اني اول حد يسيب تعليق علي الموضوع ده
واسفه اني طولت عليكي

وخلالاويص :)

Eno said...

انا حاولت ابعت كتير بس باين كده مش بيوصل ولا ايه؟؟

Foxology said...

ايه ده ايه ده انا مش فاهم حاجة بجد الموضوع عاوز مج نسكافيه عشان افهم !!

بس كالعادة >> موضوع من نوعية السهل البسيط

اتمنى ان مفيش حاجة تخف وحاجة تمرض تانى يا سارة:)

Sara Swidan said...

Eno ...

والله يا إينو .. أولاً اسمك كتكوت جداً.

كمان عايزة أقولك إني بحبني والله ... واحنا كويسين مع بعض ..
بس لما بتقلب عليا و تبتدي تدلَّع و تستعبط .. أكيد مش حطبطب عليها !

أو يكمن يكون كلامك مظبوط .. الله أعلم . هوة أنا بقيت عارفة حاجة؟؟ :)



شوفي يا إينو ، أنا التعليقات بتعدي عليا الأزل قبل ما تتنشر .. للحيطة مش أكتر يعني..

لكن إنتي مُرَحب بيكي طبعاً على طول يعني.. هو أنا أطول .

و لعلمك ، أول تعليق بيجي على أي بوست ببعته ، دايما بيكون مميز جداً عندي ..

أنا عمري ما قلت الكلام دة قبل كدة ، لكن هوة دة اللي بيحصل وحياة ربنا

نوَّرتيني

Sara Swidan said...

Foxology...

إيــــــــــه دة؟؟؟؟؟؟؟

حد يقول كدة؟؟؟؟؟؟؟؟؟؟؟؟؟؟؟

أتمنى مافيش حاجة تــــخــــف وحاجة تانية تمرض؟؟؟؟

يا فوكسولوجي أنا ساكتالك عشانن انت مننا و علينا ، لكن ...بليز بليز بي جينيتل !! بليز !


إقرا تاني .. مش حشرحلك حاجة.. صرَّف نفسك بقى !!

:)

كُبَّة


سلام

e7na said...

بجد الااهداء ده أسعدنى جدا
وانت عارفه ان مدونتك من الاماكن اللى انا باحبها ونفسى اشوفك متالقه فيها دايما


شكرا يا ساره

Sara Swidan said...

e7na...

العفو يابني على إيه ..
أنا بجد التعليقات دي هي تقريباً اللي مخلياني لحد دلوقتي مابطلتش أبعت بوستات للبلوج دة ...

ف لما إبتدا حد زيك يلاحظ أصلاً إني مش ببعت كتير خفت جداً وحياة ربنا..

Islam said...

men na7yet el e7'tilaf fel ra2y entylesa 3inadeya w mesh betesma3y wala ra2y 7ad wala kalam 7ad :P, w bel nizba l eno ...... ana 2asef ya eno bs el zaher enty mate3rafish sara at alllllllll bananit aih ya benty :D ansa7ik teshoufy sara...... sara ba2a a7med meen eshme3na a7med w ba3dn 2o3ody zakry badal el kalam dah b allah 3liky fal7a tes7ilna badry teshraby nescaffe w 7'alas :P

Foxology said...

مش بقولك مش فاهم حاجة ؟؟

شكرا على الكبة كنت جعان والله مش دى برضه زى الكوبيبة ؟؟

سلامز ومش هوصيكى على اينو دى تبعى :)

Sara Swidan said...

Islam...

الله أعلم والله يا إسلام ، أنا على قد ما بقدر بكبح جماح نفسي ... مش بدي لنفسي الفرصة يعني تتعوج عليا و تتصرف على مزاجها يعني ...

احنا عايشين مع بعض وي ما إنت عارف !!
:)

بوجِّهلك من أما قدح النسكافيه تحية ..
و ربنا يفك سجنك !
آمين

Sara Swidan said...

Foxology...

كببية؟

آه و ماله !


ماتخافش على إينو يا معلم ... بكرة تبقى بلوجاتية محترفة و محدش يقدر يكلمها !

:)

شكراً ع التعليقات الكتير دي كلها و حياة ربنا

Psycho said...

sara 7'lef ta3raf 3ala tool..
e7na yemen w heya shemaal.. matb2sh sara ya3ny:)

w lama bet3ody tetklemy ma3 nafsak..dah 7ewar asln:D
enty fakra en ma7desh wa7'ed balo.. bas ana ba7'od baly:D