Thursday, October 11, 2007

حـد غــريــب مــن بـَــرَّة



نفسي أقول كلمة ...

كلمة لو كلكوا إسكندرانية ، محدِّش فيكو حيفهمها غلط . هي دي الكلمة اللي لساني معرفش يوصل لأبعد منها عشان يتفاعل مع الموقف .

انهاردة كان في حفلة ... حفلة ف مكان ما ، و كان نفسي أروحها ، بقالي كتير أوي ، من أول أسبوع ف رمضان مش بروح حفلات . و نظراً لبعض الظروف ، جالي هاتف من جوَّة كدة بيقولِّي : " شكلك حتتباعي يا معلِّمة ، و حتروحي لوحدك !" أنا قلت إيه يعني مش مشكلة ، ما أنا طول الوقت بروح حفلات لوحدي ، و ماكنتش بستمتع ف حفلة إلا لما بكون لوحدي ، إيه اللي إتغير يعني ، مافيهاش حاجة .

و أنا بجهز للنزول ، كنت مهمومة كدة و مش على بعضي ، و حسيت إني مضايقة . لدرجة إني قلت لنفسي خلاص بقى ، انشالله عن الحفلة ما اتراحت . و اطمنت أوي ، و حسيت بالاسترخاء .

مافيش دقايق ، و جاتلي هدية من السما - رسالة بتحمل معلومات عن مكان تجمع الأصدقاء و الموعد . طيران كملت لبس و نزلت روحـتـلـهـم . أول ما دخلت المول ... جت الكلمة على لساني !
أنا إيه اللي جرالي ، أنا عيانة ولا حاجة؟؟؟ أنا ازاي مرتاحة ف المول أوي كدة ، و كنت خايفة و مضايقة من مرواح الحفلة الموسيقية ؟؟ أنا إتهبلت ولا حاجة؟

وصلت قبل الكل و طـلَّـعـت رواية فضلت أقرا فيها ، لحد الجماعة ما وصلوا ... يا سلاااااااااام ! يا متعتي و أنا وسط زحمة و دوشة و وش و لكلكة ف حوارات عبيطة ! استغربت جداً ..جـــــــــــــــــداً . لكن كنت مبسوطة ..


إيه ؟
العلاج إيه يا دكتور ، الأعراض دي جديدة عليا ...

أنا الظاهر نسيت إني قبل كدة كان في حاجات بعملها مع الناس و حاجات بعملها لوحدي ... دلوقتي ف كل حاجة . كـــل حــاجـــة . بعملها ، في معايا شريك أو أكتر ..

لدرجة إني خلاص بقيت بخاف أعمل حاجة لوحدي الظاهر !

خفت جداً من اللي ممكن يحصل بعد كدة ، ممكن تحصل يعني و ناس يستأذنوا من حياتي و يتكلوا على الله ... ممكن تحصل يعني .
حسيب أنا بقى كراسيهم فاضية ، و حثبت مكاني خايفة أعمل حاجة من غيرهم ، عشان محسش بالاغتراب ... ولا استضيف حد تاني مكانهم ؟ ولا أشيل الكراسي من أصله ؟

مش برضة من الصح إني أكون على أهبة الاستعداد ... للاستغناء ؟

غريب أوي الموضوع دة ؟
أنا بخبي حاجات على نفسي ، بخاف منها أحسن تزعَّقلي ، أو تعاقبي و تحبسني ...
و آدي النتيجة ؛
تخلي حد غريب من برَّة (البلوج) يتوسط بيننا .



وقعتك سودة يا سارة ... بس أما تيجي


24 comments:

Foxology said...

الحقيقة اول مرة ازور البلوج ده

وانا مبسوط عشان اول واحد يسيب كومنت على اخر بوست

وحكاية ان الواحد ميعرفش يعمل حاجة لوحده كنت فاكر انى كدة لوحدى ف الدنيا :)

عموما الموضوع جميل جدا وف انتظار المزيد من العقابات النفسية وتأنيب الضمير

سلام :)

Sara Swidan said...

Foxology ...

نوَّرت و آنست يا فوكسولوجي ... هو أنا أطول ، من هنا و رايح ححجزلك صف أول . ولا يهمك !


أنا بدأت أتلخم ف حياتي فجأة كدة .. مش عارفة في إيه؟؟


بكرة تتفرج و تشوف ف البلوج دة ، عصارة مشاكلي ! و سعادتي كمان قبلها

فرصة جميلة ..
إتفضل إشرب قهوتك

Foxology said...

ربنا يخليكى وشكرا على كرم الضيافة الجامد ده كمان قهوة ؟؟ يا خبر

كدة انا هاجى كل يوم عشان اشوف ايه الجديد وعشان محدش ياخد مكانى ف الصف الأولانى :)

كل سنة وانتى طيبة

Prozaaak said...

انا جاى عشان اقولك عيد سعيد يا سارة ... ربنا كده يخليه عيد ملون ومنور عليكى يارب ... ويحققلك كل احلامك :)

البوست ده بالذات بقى عايز اعلق عليه تعليق طوييييل ... لان الموضوع الاغتراب ده متغلغل فى جوانياتى ... بس زحمة العيد مش مديانى فرصة ...

بس استنى كلامى قريبا قريبا

اخبار الكحك ايه :p ??

Bahz.Baih said...

بصى يا ساره هم مش غريب و لا حاجه انك تلاق نفسك فجأه بتعمللى الحاجات كاهامع الناس... او فى جنبك صوت ... حاجه كده زى الساوند تراك ... لدرجه تخلليكى تخششى الحمام بالواك مان..صدقثنى طبيعى للناس اللى مش طبيعيه اللى زينا .. أصل البنى أدم اساسا حيوان إجتماعى بيحب اللمه عن نفسى يحن للأيام اللى كن أقعد فيها لوحدى أكلم نفسى ..ز مره أختى ضبطتنى بكام نفسى و انا صغير راحت لماما .. الحقى بهظ أتجنن... بس يا ستى .زز بوست جميل بس خوف مالوس مبرر .. لأنك لو لقيتى مره حد صابك و لا بتروحى الحفلهلوحدك ..ز أبقى كلمينى و انا اجى معاكى.. زى ماهو ممكن تكلمى ناس تانيه كتير و تروحى معاهم

Bahz.Baih said...

بصى انا كتبت تعليق طويل قوى و لما جيت اببلشه اتمسح معرفش ليه..ز حاولت فى التعليق أكون ظريف و دمى خفيف و أفولك شويه فلسفه عن الانسان الحيوان الاجتماعى و ازاى كنت بكلم نفسى و انا صغير لوحدى علشان كده بقيت احب اقعد مع الناس .. بس اهم حاجه الانفيتيشن اللى سيبتهالك . يا ساره لما تلاقى نفسك رايحه حفله و محدش معاكى ابقى بس كلمينى و انا اجى على طول
ااااه .. على فكرة البوست فعلا لذيذ

Sara Swidan said...

Foxology ...

القهوة قهوتك يا سيد البلوجاتية ...

تشرَّف و تآنس

:)

Sara Swidan said...

Prozaaak...

وأنت طيب ، و عيدك أجمل و أسعد و ملون و مليان بخور ...

إنت قريت البوست بتاع ابخور و الدجالين و الجاذيب اللي كتبته الشهر اللي فات .. كان اسمه "كان ممكن" باين . مش فاكرة !!

اقراه يمكن يعجبك !!:)

ف انتظار تعليقك الطويل بعد الزحمة يا باشا ... دة احنا كلنا نوسعلك !

:)

Sara Swidan said...

Bahz Baih ...


أيه دة؟؟ بــــهــــظ؟؟؟

و كام؟؟ تعليقين؟؟ اتــــنــــيـــن؟؟

دة شرف أنا مش قده . وحياة ربنا مش بجامل!


يعني أنا بقولك عايزة أدرب دفسي على الاستغناء تقولي إنك موجود ؟؟ يعني بتفسد عليا التدريب العملي!!
لكن عظيم إنه يكون عندي أنفيتاشن مفتوحة يعني ، مايخسرش !!
:)

قصدك إني حــيــوانــة اجتماعية إذن !!

هايل رائع عظيم .. عظيم جداً ! دة كلام أنا سعيدة إني سمعته !!:) ياريتك تحسن الملافظ .. بي جينتيل !!


هو إنت من صغرك بقى و هم بيقولولك يا بهظ ! أنا كنت بحسبه إسم طلعه عليك الواد بلال ... لأسباب غريبة بقى!!

إنما إنت اسمك الحقيقي إيه؟؟
ولا دي حاجة كونفيدينشال؟؟
:)


التعليقات بتظهر بعد ما أنا أقراها و أوافق على نشرها ، يعني ، عشان شفت في بلوجز تانية ناس بتشتم و حاجات كدة ف احطياطي ، خليت التعليقات تعدي عليا الأول قبل ما تنزل ف الفنجان تبوظه !!

فرحانة جداً بتعليقاتك يا بهظ بيه !!

على باب الله said...

أنا أول مرة أزور مدونتك الجميلة

و بجد الإنطباع الأول
( axe اللي بيدوم مع )
كان إعجاب رهيب بطريقتك في الكتابة و أسلوبك الجميل

قلمك رشيق قوي .. و حلو قوي بشكل وحش
----

مستني تروح حالة التوهان دي و بعدها أفكر أكتب كومينت علي البوست

----

خيرالدين said...

بقى كده يا ساره الكابتن يعمل عمليه ولا تسالى

Bahz.Baih said...

بقولك ايه روحى عندى و أقرى أخر بوست
كائنات درجه تالته تتغذى على البن

Anonymous said...

اولا كل سنه وانتى طيبه ثانيا بلوجك حلو شد انتباهى فى اول زياره
ثالثا بالنسبه لموضوع البوست فى حجات لازم تتعمل وسط الناس وفى حجات لازم تتعودى تعمليها لوحدك والاتنين بيختلفو من شخص للتانى دورى انتى بنفسك بقاء
تحياتى

Anonymous said...

to7fa ya saraaaa
dosty 3ala gar7..
bas begad 3agbany awyy

alzaher said...

إزيك يا سويدان
حبيت أقولك بس على حفلات منير القادمة
http://www.facebook.com/event.php?eid=25448295456
http://www.facebook.com/event.php?eid=5431126093
ارجو أني أشوفك في أي واحدة فيهم
:)

Sara Swidan said...

على باب الله ...

يااه للدرجة دي؟؟

ربنا يخليك . شكراً على المجاملة الجميلة ، و الكلام الحلو ..

مستنية بقى لما تفوق من التوهان بتاعك عشان أتفرّضج بقى على الكلام اللي زي الطوب إنشاء الله !!

:)
نوَّرت الفنجان

Sara Swidan said...

e7na ...

والله العظيم آخدة بالي إنك مختفي ..
والله!!

أنا قلت ما أنا كمان بحب أختفي و أظهر لوحدي ، ف قلت عشان كدة بلاش أشوش عليك الاحتفاءة ..


عملية ايه؟؟
استئصال االإحباط؟؟؟

ألف ألف ألف سلامة ؟؟



عميلة إيه بجد؟ بقالي مدة مش بدخل على بلوجك يابو الكباتن ... حطل أشوفه!!

ألف سلامة بحد ..

Sara Swidan said...

Bahz Baih ...

لا تــــــــعــــــــــــلــــــــــــيــــــــــــــــق !!


أنا بس مستغربة جداً أنك كمان قريت البوستات .. كامة كامة ، احد ما طلعت بالجملة دي ...


بجد أنا ... دة وسام أنا أعتز بيه !
والله بجد من غير تهريج ..

ميرسي بجد يا بهظ على الكلام الجميل

Sara Swidan said...

رئيس جمهوريه نفسى ...

أولاً وانت طيب و لة انها متأخرة ..
ثانياً شكراً على كلامك و اهتمامك ..
و ثالثاً ... ماهو أنا الغلطة اللي ارتكبتها إني دخلت كل الحاجات على بعض اللي يتعمل مع الناس و اللي يتعمل من غيرهم ...
ف لـُصـت !!

رابعاً : اسمك فريد جداً و مثير للجدل !!

شكلك حكايتك حكاية !

نوَّرت

:)

Sara Swidan said...

Psycho ...

ميرسي يا أميرة يا كتكووووووووووتة!!
مع إنك بقالك مدة مش بتكلميني عشان بقعد على الكمبيوتر كتير ...

جاية تكلميني هنا؟؟؟
حنتواصل عبر فضاء السايبر يا أميرة خلاص؟؟

نوَّرتي قهوتك
:)

Sara Swidan said...

alzaher ...

حشوفهم دلوقتي يا عمرو و حرد عليك ..
كويس أوي بقالي مدة نفسي أروح حفلات يا خواننا ، أنا إللي ضيعت من إيدي آخر فرصة !!

ربنا بعتك ليا يا واد يا عمرو !

فينك من زمان؟

Anonymous said...

ول مره اسيب كومنتين لحد فى يوم واحد
عاجبنى اسلوبك جدا
ذاتى قوى
كلمات بتتسابق عشان توصف حاله معينه ليكى
الذاتيه فى البلوج واقعية وغير مفتعله
انا اساسا بحب الناس اللى بتكلم نفسها زىى كده
احمد عصمت

CoOl GuY said...

aih dah 7ana2ish el mashakil el 3a2leya hena wala aih likom biety ya amira w ya sara w bel nezbaly ana shakly gaaai tooooooo late but i kind likes this words about the blog have my reasons and don't be afraid Human is a social Animal as Bahz bih said w akeed beyshouf nafsoh bien el nas :) w bel nezba enek msh 7atla2y nafsek raga3ty lel we7da just to feel the grace of people cares about u around u heya keda shad w gazb thats all and u know :D sorry for not commenting u know kont fel segn lol

Anonymous said...

hia ilnas 3andko lih mabta5odsh makan ilfara3'?!
ilnas 3andko ma7atat tram.....w mish kol il ma7atat liha lazma kaman......eshtro ilnas ili mabtetysharash
3agaby!!!!!!