Monday, November 26, 2007

تـعـويـض



كنت بصلي الضهر جماعة ف مسجد الكلية ، و أنا ساجدة حسيت بشعري طالع من الطرحة اللي بلبسها من المسجد (أنا مش محجبة) ... و اكتشفت إني مش بحب أصلي جماعة ... مش بحب أزاحم ع الصلاة كمان يعني . و حسيت بنفسي بلعب ف شعري و أنا ساجدة . أكني بقول لنفسي ... إنتي لسة إنتي ماتخافيش .

بحس بالغربة ف صلاة الجماعة . ف نفس الوقت أنا ممكن أدخل المسجد قبل الصلاة و أفضل قاعدة ، أو أصلي القضاء اللي عليا ... و بتبقى من أكتر الفروض اللي بركز فيها جداً . بستمتع . و اكتشفت ان الموضوع مش موضوع مسجد . مش موضوع مكان ... هي بس حالة .

أنا كائن بيتوتي من الدرجة الأولى .. أو التانية . أي مشكلة تتم برَّة البيت ، علاجها ... إني أرجع البيت .
و العكس . (للأسف)

ف فترات كدة ... البيت بيصيبني بالخمول . مش عايزة أعمل حاجة . عايزة أترمي ع السرير أو قدام التلفزيون ... حتى لو عايزة أنام مابيجينيش نوم . ف الأوقات دي ، مقابلة واحدة من إسلام ... بتكون العلاج .

انهاردة اتبهدلت طول النهار ... رايحة جاية من مشارقها لمغاربها بعمل حاجات . و ف نفس الوقت مش حسة إني نفسي أرجع البيت . ناعية هم الخمول دة .. خصوصاً إني مش هقابله كمان . لكن ف النهاية رجعت البيت .. دخلتُ الأوضة و حطيت الشنطة . لقيته قاعد ع الكومودينو اللي جنب سريري ..
أقصد الوردة إللي جابهالي امبارح .. كنت و أنا ف الشارع ، ناسية خالص أمر الوردة ، عشان كدة ماكنش نفسي أرجع البيت . خـَفـِّـيـت .
وفضلت أتحرك بيها من حتة لحتة ف الأوضة على حسب اللي بعمله .. و أنا قاعدة ع الكمبيوتر دلوقتي الوردة قدامي جنب البخور .. لو بقرا أو كدة ... بحطها ع الكومودينو

فرحت جداً .. و لاقيت (رغم إن دي مش أول وردة منه خالص) إن الحاجات اللي ليها أثر تعويضي .. ليها التأثير الأكبر . و بلعت ريقي و أنا بفكر : لو كنت شـُفـتـَك انهاردة ، كان زماني دلوقتي ضهري للوردة و أنا بـفـُك رباط الكوتشي


الغربة لها أوجه عديدة ... جايز أكملها ف بوست تاني ولا حاجة ...
إنما دلوقتي .. أنا مبسوطة


35 comments:

Yasmine Adel Fouad said...

اجمل بوست اقراها من فتره

حقيقيه اوى

جاية اعزمك ع الحفله
عندى التفاصيل
اوعى تكسفينى

With Myself said...

بلعت ريقي و أنا بفكر : لو كنت شفتك انهاردة ، كان زماني دلوقتي ضهري للوردة و أنا بـفـُك رباط الكوتشي

الجملة دي عجبتني ، فعلاً ساعات الواحد أما بيفتقد شخص بيلاقي تعويضه في جزء منه أو حاجة هو اهداها لينا

Sara Swidan said...

أنـــا حـــــــــرة ...

أنا أصلاً لحد دلوقتي مش قادرة أصدق أصلاً يا ياسمين ..

أنا بجد فرحانة إني كنت شاهدة من بعيد لبعيد على ولادتك ككاتبة متميزة يعني ..
دي حاجة أنا أفخر بيها جداً . و ححاول بجد إني آجي ..

و حعمل المداولات من بكرة . وعد ..
كفاية اهتمامك كمان !!

مبسوطة إن البوست المتواضع عجبك ، و بزيارتك الجميلة اللي شرَّفتني حضرتك ...

شوية احترام كدة

Sara Swidan said...

With Myself ...


أولاً ... أنا مش عافة أشكرك أد إيه على زياراتك الكتيرة دي كلها يعني الصراحة .

ولا مرة شربت قهوتك ...(فوت بكرة احنا آخر الشهر)

الجملة دي فعلاً من أقرب الجمل لقلبي و أنا بكتب البتاع دة !!
بجد يعني .

شكراً مرة تانية ، و يارب ماتتقطعش زياراتك فجأة زي عوايدك

:)

حدوته مصرية said...

بوست جميل
عن انك كائن بيتوتى فبما انك عارفة كده يبقى حاولى تكونى اجتماعية يعنى بين البيت وبرة مش ناحية واحدة بس مش انعزال يعنى

حالة الانفراد مع ربنا فى الصلاة او غيره بتبقى جميلة جدا لكن لازم يوم هتعرفى كمان ان صلاه الجماعة ليها جمالها لانها مهمة برضه

تحياتى

With Myself said...

لسه النهاردة راجع من إسكندرية :D

ِشربت قهوتي في أكتر من مكان هناك ، بس أحلاهم قهوة ناحية المنشية علي البحر ، قهوة مجهولة بلا اسم تقريباً قعدت أشرب فيها قوة الساعة 3 الفجر والشارع فاضي والبحر ادامي

فعلاً أنا بحسدكم علي ست البلاد اسكندرية البنت الصبية ;)

Sara Swidan said...

محمد ياسر ...

الفكرة ف التزاحب يابني ..

أنا ممكن جداً أحب أصلي جماعة على ميكروفون الجامع اللي تحت البيت يعني . بس تبقى ليا مساحتي يعني .

لأ ..
بسرح ف صلاة الجماعة

شكراً على تعليقك

Sara Swidan said...

With Myself ...

أكيد أكيد ...

الـــتــــجــــاريــــة .

قهوة المثقفين ف اسكندرية

احسد يابني احسد ... خد راحتك ... ماهي فعلاً تستاهل


نوَّرتها ... كنت بتعمل إيه بقى؟؟

:)

With Myself said...

انا ما يهمنيش الأسامي أنا يهمني المكان والجو :D

اعتقد أن نفس القهوة الصبح مش ها تبقي حلوة
الجمال كان في الجو والهدوء وحالة الإكتئاب المصاحبة :(
عشان كده طلعت اسكندرية اغير جو شوية

Foxology said...

بوست غريبة بس حلوة :)

Sara Swidan said...

With Myself ...

يا دماغك الرايقة ..

أحييك ع الاختيار الصائب

Sara Swidan said...

Foxology ...

غريب؟؟ صحيح؟؟

المهم إنه عجبك !

حمد الله ع السلامة يا باشا

CoOl GuY said...

ana :D esmy maktoub :) :)

alzaher said...

كلنا هذا الرجل
:)

Sara Swidan said...

Islam ...

يعني طلعت ف التلفيزيون يا خي ؟

دة تشابه أسماء ..

عين عبعال

:)

Sara Swidan said...

Cognition-sense ...

شكراً ع المجاملة و الكلام الجميل..

أنا كمان كنت واثقة إني مش لوحدي ف موضوع صلاة الجماعة دة ..

استحالة يكون كل البشر دول مبسوطين كدة يعني .

شكراً على زيارتك و تعليقك ، و أتمنى تكررها

Sara Swidan said...

alzaher ...

قصدك اسلام يا عمرو ؟؟
إنت كمان بتهادي بورد بمناسبة و من غير مناسبة؟؟

ولا قصدك إيه؟؟

:)

Anonymous said...

أول مرة أزور مدونتك

أنا كمان بتصيبني حالة الخمول دي أحيانا و أرابط في البيت غالبا قدام الكمبيوتر
أحيانا بدون سبب واضح

مدونتك جميلة رغم إن قهوتي سادة
:)

أنا عربي said...

أنا قريت البوست من فترة بس بعلق دلوقتي على أساس اللي فاكره من البوست.

كل اللي أقدر أقوله إن مفيش أحلى من إن الدين يبقى علاقة الأنسان بربه.

مفيش أحلى من إن الواحد يقعد يصلي لوحده في هدوء.

تكون فيه علاقه روحانية بين الشخص و الأله. علاقة خاصة جدا.

و أعتقد إن هو ده المغزى من الصلاة أساسا.

روابط said...

بفرح جدا بكتابات البنات , فى وقت معين فكرت ان الكتابة عمل ذكورى بحت فى المجتمع المصرى , وبعشق الكتابة عن التفاصيل الصغيرة والتى تشكل جزءا كبيرا من حياتنا , وعجبانى قوى الوردة الحمراء اللى فى القلة .. مش دى قلة

Prozaaak said...

دايما تعليقى ييجى اخر واحد فى الصف :) .. مع انى متأكد انى ببقى اول واحد بيقرا البوست عشان دايما انا بقراه وتحتيه مكتوب " زيرو كومنتس " بس كعادتى فى ارجاء اى حاجه لاخر وقت .. بحب دايما اسيب مساحة لنفسى اعيد وازيد فى الحاجه ... وافكر ياترى الانعكاس اللى انا عايز اقوله دلوقتى ده حاجه لحظيه .. طيب مش ممكن اغير راى بعد كده ...
بمارس حاجه اسمها البصاق الفكرى ... انا اسف لو التعبير مقرف حبتين .. بس واحد من الكتاب اللى بحبهم جدا وشايف انه زانق نفسه فى بوكس اصغر منه بمراحل وهو " احمد خالد توفيق " داميا كان بيقول فيه نوعين من الناس .. واحد بيمارس القىء الفكرى .. وده اللى بيدلق اللى بييجى على باله اول مايحس بيه .. ونوع تانى بيمارس " البصاق الفكرى " وده اهدى شويه .. وبيحلل وبياخد وقته قبل مايبتدى يفكر ويكتب
ربنا يسميه بالخير بقى :)

انا كان ليه تجربه قريبه اوى من ربنا فى احد الرمضانات اللى فاتت .. رمضان اللى قبل ده على طول بالتحديد ..
انا بطبيعنى العاديه انسان مش اجتماعى بكره ثانى اكسيد الكربون وبحب جدا الاكسجين .. وعشان كده كان لازم موضوع صلاة الجماعه ده يبقى تقيل شويه عليه فى الاول .. ويمكن لحد الوقت ده لازال
بس تعرفى يا ساره ... فى حاجه اتعلمتها فى رمضان اللى بقولك عليه ده .. او مش اتعلمتها .. خلينا نقول احسن حسيتها .. لان كان فيه ناس بيحاولوا يشربونى الشربه بالمعلقه بالعافيه وده كان سبب انتكاسه فظيعه حصلتلى بعد كده

اللى حسيته شويه بشويه ... ان روح الجماعه دى فيها حاجه عجيبه كده ... ومع انى مكنتش حاببها بس كان فيها نوع من السحر وحاجه بتشدنى برضه ... حسيت بحلاوه ليها كده وانا اساسا واخد موقف
دايما فى احاديث سيدنا محمد كان بيكلمنا عن ازاى ان نا المفروض نبقى متوحدين ومتجمعين .. وازاى الناس كلها لازم تشارك فى حياه اجتماعيه ناجحه بالدرجه الاولى ... صلاة الجماعه حاجه من ضمن الحاجات دى او يمكن تكون بتعودك على حاجات معينه كنوع من المديتشن لو اقدر اقول عشان الحياه الطبيعيه اللى بره
عارفه ... التلاحم مع الناس لما عرف تيرجم جوايا من مجرد ان مساحتى الذاتيه الىل انا محتاجها بتتناقص لشعور بالتماسك والوحده والألفه ... شعور كده زى مانكون كلنا حاضنين بعض وخايفين على بعض .. فى دفء كده ياساره مصاحبه حاجه روحيه جايه من فوق
عرفت معانى يعنى ايه ممكن احب واحد بجد معرفوش تماما من غير ماكون عايز منه اى نوع من نفع مادى او معنوى .. بحبه فى الله يعنى :)

يمكن اجمل سحور كلته فى حياتى كان جوه جامع مع ناس معرفهاش ... عمرى ما حسيت بشعور زى كده
ومع انى لحد دلوقتى برضه مقتنع انى بقى تواصل جدا مع ربنا لما ببقى لوحدى تماما ... بس فعلا فعلا اكتر لحظه اللى وصلت فيها لحاله زى اللى بيوقوا عليها اللى بيلعبو يوجا .. زى ماكون طافيت فوقى وروحت لمكان تانى كانت فى صلاة تراويح ... لحظه بجد نفسى اوصلها تانى ولو لمره واحده كمان فى عمرى اللى جاى

الموضوع فعلا حاله .. بس مش حالة مكان بس يا ساره ... حالة تلاحم مكانى وروحى .. وحالة تواصل مع ربنا من فوق وتواصل مع الناس اللى حواليكى ... كله فى وقت واحد

وبرضه عشان كل حاجه ليها وقتها وحالتها فربنا ادانا صلاة التهجد دى مخصوص علشان الواحد يبقى لوحده تماما مع ربنا من غير مايحس ببحر من العيون مسلط عليه :)
كل حاجه وليها وقتها وطعماها يا ساره .. بس المهم نعرف ازاى نظبط مواجتنا مع كل حاجه ونطلع منها احلى ما فيها يعنى

بانسبه للورده :) ساعات كتير جدا بحب ان الشخص يدينى حاجه معينه ... حتى لو ممكن يبقى فى ايدى انى ابقى معاه 24 ساعه فى اليوم ... بس ساعات بحس انى دلوقتى نفسى اقعد مع حاجه منه كده .. مش عارف ليه ساعات بيبقى ليها معنى اكبر من انى اقعد معاه شخصيا فى وقت من الاوقات ... ومع ان ده ناس كتير ممكن تعتبره حاجه غريبه .. بس يمكن ساعتها ببقى قاعد انا ونفسى وهو ... يمكن ساعات ممكن نحب نبقى قاعدين مع مدلولات ورموز اكتر من مجرد قعده طبيعيه واضحه مع شخص ما ...
انا اللى معقد ولا ايه ؟
بس اللى متاكد منه جوايا انى ساعات ممكن احب اقعد مع الورده اكتر من انى احب اقعد مع اللى جايبهالى شخصيا فى وقت معين
فسريها انتى بقى :)

سورى .. صدعتك :)

L M A R said...

مساء الخير


انا اول مرة ازورك تقريبا

في حس مرهف وجميل



تحياتى

Blank-Socrate said...

مدونه جميله و هاديه
و اشعر بالسلام اللى انت فيه

CoOl GuY said...

gamed el new interface dah ya sara thanx to sheirf :)

Sara Swidan said...

يَحيى المِصري...

أنا جيموقراطية جداً ف موضوع القهوة دة

شكراً ع الكلام الجميل

Sara Swidan said...

Arabiology...

أنا كنت خايفة أصلاً أتكلم ف حتة صلاة الجماعة و الكلام دة ... عشان خايف الناس يقوموا عليا ... و حرااااااام و بتاع . هي مش ناقصة ..

و كلامك و كلامي وجهة نظر طبعاً

فرصة سعيدة
:)
شكراً على الاهتمام

Sara Swidan said...

حازم سويلم ...


ياااااااه ...

دة أنا على كدة واحدة حاملة راية

:)

آه هي حاجة شبه القلة كدة
نوَّرتني

Sara Swidan said...

Prozaaak ...


بص يابني ...

ماتبعتش تعليقات هنا تاني .. كدة انت جبت آخرك معايا

:)

وعلى فكرة عجبني تعبير "البصاق و القيء " دة ..

بيوصل المعنى جداً ..

أنا...معرفش بتقيأ ولا ببصق ؟؟


المهم يعني ... ماتبعتش تعليقات هنا تاني
:)


شكراً يا شريف

Sara Swidan said...

A L A B D E L R H M A N .

شكراً على اهتمامك و ع التعليق الجميل

كررها

:)

Sara Swidan said...

Blank-Socrate ...

صحيح؟
حلو الشكل الجديد؟؟

طب محدِّش شامم فيه ريحة يا جماعة؟؟

Sara Swidan said...

Islam...

شفت يا إسلام؟

تـــاداااااا !!!

مفاجأة مش كدة؟
شكراً على تعليقك بجد . أنا عارفة أد إيه صعب عليك تعلَّق ..

شكراً والله

السـيد شبـل said...

سارة:
بوستك اكتر من رائع حاسس انه يمكن يكون احسن حاجة قريتهالك هو فيه صدق و ثقة وجراة ف التعبير......
انا اتفق معاكى تماما على ان القرب لربنا بيكون اكتر فى صلاة النوافل او الصلاة فى البيت.... وكمان كان فيه احد اقطاب الصوفيه" هكذا يسمون مشايخهم" الشيخ دة قال انه بيزعل عندما يؤذن لصلاة الفجر ... وعندما سالوة عن السبب... قال لأنى بترك الله" عز وجل" وارجع اشوف ناس تانى... ودة راى يدل على صدق الايمان والصدق الشديد والخشية من ربنا مع عدم الرغبة ف المراءاة او النفاق وده عند ربنا احب طبعا.......... بس فيه مهمة كبيرة بتتحقق فى صلاة الجماعه هى التآلف والتعاون والسؤال على بعض والمشاركه بين الناس والتعاون على الخير ومساعدة المرضى لما بنعرف انهم ماجوش يصلوا ... فيه فوايد كتير قوى قوى... وفيه تعليق طويل فوق وضح الموضوع ده بشكل افضل... فانت ممكن تصلى الفروض جماعه وعندك قيام الليل تحققى فيه الشعور الجميل من سبب صلاتك وصلتك بالله " عز وجل"... بين العبد وربه...
لكن فيه مشكله ف البوست بتاعك انت انتقلتى من الحوار ده لموضوع اسلام بسرعه وده ماكنش مظبوط ... زعلتينا وخلتينا نغير والله

Sara Swidan said...

السيد شبل ...

شـــكـــراً جداً يا شبل وحياة ربنا ع الكلام الجميل .

هو فعلاً تطلب مني شجاعة كبيرة .. إني أقف كدة و أقول لنفسي أنا مش بحب أصلي جماعة و بعملها "حرفياً" غصب عني.

والله!

بس لا غيرة من اسلام ولا حاجة ...
إدعيله هوة بس ربنا يصبره ع البلوة اللي هوة وقع فيها ..

معايا؟

شكراً يا شبل على تعليقك ..

حلم بيعافر said...

جميل جدا كلامك
ومن قلبك
علشان بيصدق علطول

Ahmed Fayez said...



حاسس ببساطة في الكلام و تقائية

و بنفس البساطة و التلقائية ممكن اسألك
ليه مش محجبة؟؟