Friday, November 16, 2007

عصافـيـر غـبـيـة



حيبقى الوضع مختلف أد إيه لو ركِّبوا سماعات ف كل شارع ... بتشغَّل أغاني ، نفس الأغاني ف مصر كلها ...، عشان تسلِّي الناس الماشية ف الشارع و تهدي توترهم ...

مش حيختلف كتير عن اللي حاصل ف الحقيقة دلوقتي !!

إزاي ؟

الشارع اللي أنا ساكنة فيه ... أنا بحبه جداً ...ساعات يبقى فـــــاضــــي جداً و مخيف ... و طبعاً مريب . و ساعات يبقى صاحي و كـُله حياة ..

كنت مرة راجعة البيت ، و دخلت عند بقال كدة أشتري حاجة .. أصلاً محل صغير و لو إتنين وقفوا فيه ، خلاص اتقفل . كان فيه ناس .. لكن ناس هادية مش عاملة دوشة كدة ف المحل .. و الولد اللي بـيـبـيـع عمال يحط الحاجات ف الكيس بهدوء .. و الناس اللي واقفة برضه هاديين و صدرهم رحب (ف الآخر طلعوا كل الناس دول مع بعض يعني ) و كان فيه راديوا شغال .. كانت أغنية كدة لـ "عبد الحليم" مش عارفة اسمها .

المهم ، طلعت من المحل . و أنا ف الطريق للبيت بعدي على خضري كدة .. قدامه بالظبط فرن فينو قديم و مهجور كدة مافيهوش زباين ...

بالظبط دة اللي أنا حسيت بيه ...
أنا ماشية كدة .. لقيت صوت نازل عليا من السما . صوت متظبط و متقسم .. أغنية . و أنا ماشية إتخضيت ، أنا عارفة لو دي عربية معدية و معلية الأغنية ... الصوت مش هيبقى بالوضوح دة . بالاضافة إنه كان صوت "عبد الحليم " برضه ..

اكتشفت إن الخضري و الفرن الاتنين مشغلين الراديو ... و الاتنين على نفس الاذاعة . إذاعة الأغاني .
عشت لحظة تناغم عاليا جداً .. رغم إني مش من المعجبين الـفـُظاع بـ" عبد الحليم" يعني .. بحبه طبعاً . لكن مش أد كدة . خطر على بالي فكرتين واحدة فيهم تخوف ، و واحدة هايلة !!
كان ممكن أحس بـ إيه لو مثلاً كانت الأغنية اللي شغالة ف الراديو لـ "محمد منير" ؟

أد إيه كنت ممكن أتأثر ... أو أعيط مثلا و أنا ماشية ف الشارع ..
(أنا طبعاً مش محتاجة أقول إن دة مش معناه إن منير أفضل من حليم أو كدة ... لكن هي أذواق ف الأول و الآخر )

و الفكرة التانية .. أنا ممكن أبقى عاملة إزاي لو عشت برة مصر ؟؟
إيه علاقة دة بأي حاجة ، مش عارفة .. أنا أصلاً إذاعة الأغاني دي مابحبهاش .

ماركبش ... لو فكرت ف نفسي ف أي مكان تاني ، أي مــكــان ، ماركبش .. أو بالأحرى ، البلد التانية مش حتركب عليا ..

و خفت ..

من احتمال وجود نسبة من القسوة ف قلبي تجاه البيت الكبير (مصر) ، موروث من أبويا اللي مسافر معظم الوقت . رغم إني عارفة إنه عارف كويس أوي إنها أحلى حتة ع الأرض غصب عن عين اللي يقول غير كدة ... و كل حاجة بتقول عكس كدة . و أنا عارفة كويس جداً أد إيه محدِّش حيكون بيقدرها و بيحبها و بيعبدها قدُّه ... لأنه بيرجعلها تاني و بيسيبها غصب عنه .. مش لرغبته ف دة ...لكن برضة دة مايـنـفـيـش عنه تهمة القسوة .

و فرحت ..

إني حبست نفسي ، بمنتهى اللذة ... ف الوقت اللي فيه كل العصافير الذكية عايزة تخرج . أصل ف أمريكا و الدول المتقدمة ... بياكلوا مع الكباب سلطة طحينة !

...

خليهم يغوروا ..
خلوها تفضى ليا .. أنا و باقي العصافير الغبية اللي عايزة تقعد ف مكانها .. و تبني العش جوة القفص و قفص تاني جوة العش ... هنا ف الدفا . ع الأقل لو اتـبـَقـَّى واحدة بس بتحبها قاعدة فيها (أنا) ، ف دة يأكد احتمال وجود غيري ..

خليهم يغوروا ..

أنا قاعدة ..

كملت مشي و أنا عارفة إنها سمعاني كويس جداً .. و الأرض بتتهز بيا .. و بالشحنة الموجبة اللي خرجت مني ..

كان في زنقة عربيات كدة ف الشارع .. عربية داخلة عكس الطريق و عربية تانية ف وشها ...و الشارع واقف ..

و العربيتين و الفرَّان و بتاع الخضار و البقال بيسمعوا إذاعة الأغاني ...


و أنا بحب البرنامج الموسيقي ،

و مش بحب سلطة الطحينة ..


11 comments:

Bahz Baih said...

عارفه يا سارة مشكله مصر الحقيقيه فين .. هى أن كل العصافير الذكيه مشيت ورا الكباب على حد قولك و سابت فى مصر كل العصافير الغبيه... معملناش حاجه علشان العصافير الذكية تفضل تزقزق هنا و هناك عملولهم كباب.... عجبنى جدا البوست أصل لما كنت فى بولندا الغبيه لقيتهم عاملين أيه ... بيشغلوا مزيكا فى محطات الاتوبيس .. جه فى بالى لو عملنا هنا فى مصر هنشغل أيه ... ياترى منير و لا سعد الصغير ... لا مش هنشغل حاجه أصل الغنا حرام ... مسنى أوى البوست ده يا سارة... بس صحيح هو فيه أيه الناس مالها أضربت بأبهاتها و أمهاتها ..ز مش ملاحظه أن كل اللى حوالينا بيعملوا بوستات أفلام عن أبهاتهم و أمهاتهم ... هو فيه أيه ؟

With Myself said...

يخرب عقلك!

Sara Swidan said...

Bahz Baih...

بجد دة غباء يا بهظ ..

ما ف محطات المترو ف القاهرة مشغلين تلفزيون ... فيه بتاع 5 اعلانات هبلة ... والله الناس متسمرة قدام التلفزيون و حيجيلهم تخلف ..

حرام إيه و زفت أيه ما الاعلانات اللي ف المترو اعلانات على أفلام .. و هبل كدة ...



مرة حبعت بوست تاني كدة على حاجة قريبة جداً من كدة !!


يشغلوا مزيكا بس ..

بودابار مثلاُ... أة موسيقى خفيفة زي البرنامج الموسيقي من 12 بالليل لـ 9 الصبح ...

رغم كل دة ... الجمال وجد طريقه لوداني وودانك ، وودان أي حد كان ماشي ف الشارع ف اللحظة دي ..


حمدالله ع السلامة كمان ...

أنا قلت حترجع تتكلم زي الروبرت ..

"سعيد لمقابلتكم ، أشكركم"

اشطة

Sara Swidan said...

With Myself...

أكتر من كدة يابني؟؟


ربنا يزيدني كمان وكمان بجد ..

يا متعتي!!



إنت دخلت السجن انت كمان و خرجت ولا إيه؟

Islam said...

talmi7ek 3an el 3asafir el 3'abeya wel zakeya sa7i7 mahy law el 3'abeya kan 3andaha shewayet 3a2l kanet 3araft enaha lazem tesafer abl mal shita wel bard wel go3 ye2rousoha w lama dah ye7sal 7aykon fat el 2awan w sa3etha wala 3abd el 7alim wala monir 7ayenfa3ha w lola your dad w eno met3'arab u won't be able to buy monir aw to go to 7'odary or ba2al or anywhere w about a7' bahz el 3'ona 7aram shi2t 2am abayet w sama3na lih mesh 7ay7'alih 7alal zayoo zay le ser2a mesh ma3na eny 7aramy yeb2a el ser2a 7alal

Sara Swidan said...

Islam...
طيب شوف مصلحتك
بقى و ماتبقاش زي العصافير دول.
مش هوة دة بردو اللي اسمه العناد و حــــلاوة الروح؟

Prozaaak said...

لحظة صفا

Sara Swidan said...

Prozaaak

ميرسي

:)

جاهز؟؟ أنا جاهزة!

يللا بينا

Diyaa' said...

رغم اعجابي بأسلوبك في الحكي وبالمدونة ككل رغم إني دخلت هنا صدفة بعد فترة طويلة مفتحتش فيها البلوج سبوت
بس مش حابب أمشي قبل ما أنكشك في نقطة صغيرة :))
ليه تبقي أغاني ؟
أقصد إن في كلام أهم من الأغاني ممكن نحلم إن الناس كلها تسمعوا وتحسه وتفهمه..اه الرومانسية والأحلام جميلة وبتخفف عنا لكن الحل مش في المزيد منها ..كوني واقعية
تحياتي

hamadasamo2000 said...

مساء الخير او صباح الخير اولا هاى على كل شباب المنتدى انا عجبنى الجو بتاعكو ممكن تقبلونى كصديق ياريت رد على طلبى

winner said...



أعتقد اني من العصافير الغبية
على الرغم من كل المساوئ الا اني لسة متمسك بكل شئ فيها
حتى الغباوة