Saturday, December 1, 2007

أحلامي


المكان ... (1)

بيتين قدَّام بعض . التراب ع الأرض بيطلع صوت تحت الجزمة . الدنيا نهار و شمس مش حارقة .. لكن الهدوء مخيف .
أنا و دعاء و أميرة(أخواتي) و بابي و مامي . بابي و مامي ف بيت من البيتين .. و أنا و أخواتي مستنيينهم ، و بنستكشف البيتين المهجورين .
و أنا كنت مضايقة من نفسي جـــداً عشان ماجبتش معايا الكاميرا عشان أصوَّر البيتين ...
بالتحديد صورة لبلكونة مقفولة ، من سنين ، و نازل من البلكونة سَبَت نازل لحد تحت .


المكان ... (نفس المكان)

أنا كنت ف مطاردة ... واحد بيجري ورايا ، أنا مش خايفة ، لكن مرهقة من كتر الجري . بقالي 4 أيام ، كل ما بنام .. بجري .
لقيت نفسي جوة البيت دة . برضة مستخبية من الراجل دة اللي أنا كنت عارفاه بالاسم ف الحلم . لكن أنا كنت مستهزءة بيه .
قابلت ف البيت دكتورة سحر الموجي .. اتكلمنا كلمتين و ضحكنا ... و كانت حامل .
و لما نزلت م البيت اتخبطت ف الكاتبة سمر يزبك .. اللي عمري ما قابلتها ف حياتي ، شفت صورتها بس علي روايتها .
اتخبطت فيها و أنا خارجة م البيت ، و اتأسفتلها ، ضحكت و قالتلي :"ماتتأسفيش ، ماتبقيش غلسة ! "
و كانت لبسة أبيض ... فستان أبيض فضفاض . أنا فكَّرت ف الحلم : "الله ، لو أنا بظهر ف أحلام الناس كدة ... لبسة فستان أبيض و لطيفة ، و مبتسمة ف حلم طويل و مرهـِق ."

و صحيت قلبي بيدق - ارهاق من الجري ...

الحلم الأول جاني تاني يوم بعد ما بابي جابلي الكاميرا هدية لعيد ميلادي ... (بعد الكاميرا الأولى ما اتسرقت)
الحلم التاني جاني أول امبارح ... و أنا عندي حالة عـَطـَش أدبي


24 comments:

السيد شبل said...

امنى اكون اول تعليق...
سارة انت مجنونة ... بس جنونك دمه خفيف...
انا على فكرة سعيد قوى انك بتنزلى بوستات كتير..زيي يعنى لكن انت بلاقينى دايما عندك وبعلق على بوستاتك وانا مش بشوفك ابدا.... اتمنى يكون بيننا كلام ياسارة... انت جاية الحفلة بتاع التوقيعات

Sara Swidan said...

السيد شبل...

ربنا يخليك يا شبل والله ..

مبسوطة إن البلوج عاجبك .

مابيتهيأليش إني حاروح كمان ...
أنا مضايقة جداً م الموضوع دة ...

شكراً على اهتمامك يا شبل وحياة ربنا

alzaher said...

أحلامنا دائما تعبير عن رغباتنا المكبوتة
عما لا نستطيع فعله في الواقع
انا ايضا تراودني منذ فترة احلام
ولكن أظن ان أحلامك اجمل من أحلامي لأن روحك لا تزال اكثر نقاءا
:)

Sara Swidan said...

alzaher...

كلامك حلو والله يا عمرو ... تنفع شاعر.

أنا أحلامي مش أجمل ولا حاجة ...

تخيل نفسك بتنام عشان تجري .
والله احنا بنشقى يا عمرو و محدش دريان..

:)

شكراً على تعليقك .

Bahz Baih said...

أعتقد ان دى اشاره كافيه تخليكى تنزلى الشارع .. متسربعه مش مهم .. و معاكر الكاميرا و نوته و قلم و تفضللى تصورى و تمشى و تكتبى .. لغايه ما ترجى البيت و انت رجلك واجعاكى من كتر المشى و معاكر تخمه ادبيه تخليكى تنامى على السرير متحسيش الفرق بينك و بين الملل من غير بقى و تانى يوم تحطى ده على البلوج تستمتعى بتعليقاتنا ...

Foxology said...

وصف دقيق لحلم غريب فى وقت عجيب

ساعات الواحد بيحلم كوكتيل احلام من النوع ده ولما يصحى ميعرفش هو فى ايه بالظبط

الغريب ان الواحد يحلم حلم مش كامل وتانى يوم ينام ويكمل الحلم بتاع امبارح

تحياتى :)

Islam said...

adabeyan kalam gameel w yanom 3an 7agat hmmmm wad7a 7ab2a 2a2oulek 3aliha bs 3elmyan ba2a et3'aty abl matnamy :D

Sara Swidan said...

Bahz Baih...

تفتكر يا بهظ ..

اقتراحاتك بتوصل لصميم المشكلة (اللي هي أصلاً مش مشكلة خالص)..

شكراً وحياة ربنا..

Sara Swidan said...

Foxology...

آه ...حلقات الأحلام دي بتبقى جامدة ..

ممكن بقى وانت نايم ، يطلعلك نشرة الأخبار و انت نايم ...ف نص الحلقة الأخيرة و كلام من دة...

:]

نوَّرتني يا مان ...

كنت بقالك مدة ماكنتش على بالك أنا

Sara Swidan said...

Islam ...

ماشي ياظريف...

بلاش تضطرني أتكلم عن السندباد..

ها؟
خليني ساكتة يا دودي
:)

Islam said...

la2 la2 balash tetkalimy 3ano.... bs howa kan aih ana nesit :D wala eftakart balash :$ yady el 7'iba :$

Sara Swidan said...

Islam...

عمرك ما حتنسى يا بابا، كنت نسي من زمان .
معايا؟

لكن عيب عليك يا راجل ... أنا برضة مش ممكن أطرطش بكلام زي دة !
دة انت برضه مننا و علينا

sandrill said...

It is the first time for me to see your blog .. I don,t have a comment on this post specialy but I found the whole blog very attractive .. very happy to know about it

keep up your work & good luck

محمد فيروز الكمالي said...

الأحلام هو الواقع الذي نعيشه ، ولكنه يبدو أكثر سهولة من الحياة التي نعيشها ، وكل منا بداخله خيال وأحلام قد يبدو محالاً أحياناً تحقيقها ، أما أن رأيت كاتبة معروفة فلكونك كاتبة متميزة وكل إناء بما فيه ينضح

محمد فيروز الكمالي said...

كتابتك رائعة

محمد فيروز الكمالي said...

الأحلام هو تجسيد للواقع ، وكونك حلمت بالكاتبة المعروفة فلأنك كاتبة جديرة بالاحترام والتقدير ، ولديكي ملكة كتابة مرهفة ، وكما قالوا كل إناء بمافيه ينضح
أتمنى لك التوفيق وبانتظار روائعك

Foxology said...

لا جديدة حكاية النشرة دى :)

انا واينو اختفينا الفترة اللى فاات يا سارة عشان كنا بنجهز لخطوبتنا عقبالك يارب :)

سلامز :)

nyira_elsheiref said...

الله يكون فى عونك والله
أيه يا بنتى الأحلام المرهقة دى ؟؟؟
4 أيام ورا بعض بتجرى طول الليل فى الحلم .. لأ فعلا الله يعينك
سيبك إنتى اسم مدونتك حكاية ورائع كمان

Sara Swidan said...

sandrill ...

ميرسي جداً على تعليقك ...
دة تصميم صديقي شريف . تعب معايا الراجل والله ، واضح إنه تعب جاب فايدة

:)

Sara Swidan said...

محمد فيروز الكمالي ...

بشكرك ع الكلام الجميل والله ...
لو كان هوة دة المؤشر فعلاً ، ف أنا أكيد حطلع أحمد زويل ..

شكراً يافندم والله على المجاملة الجميلة ، و على تعليقك الأول ..

و ياريتك تكررها

Sara Swidan said...

Foxology ...

إييييييييييييه؟؟؟

ضحكت ع البنت و خبطتها على سهوة ؟؟؟؟؟؟؟؟؟؟؟

ربنا يقويها و يكون ف عونها ..

دي أصلها منمنمة و كتكوتة خالص ..

لا حول ولا قوة إلا بالله
قدر الله و ما شاء فعل ..

.. لأ بجد ، مـــبـــــروك
أنا معزومة أكيد ، ولا إيه؟

Sara Swidan said...

nyira_elsheiref...

شوفتي يامو فوزي ؟؟
قطيعة تقطع الحب وسنينه !

امبارح بقى حلمت إني ...
بــــــعـــــوم !

أحلام رياضية خالص .
المرة اللي جاية حنام بنضارة البحر شكلي !

نوَّرتيني يا مسخرة

Foxology said...

ههههههههههههههههه

لا والله مش على سهوة ولا حاجة الموضوع اخد وقته الطبيعى هى اللى ضحكت عليا وخلتنى اخطبها :)

الخطوبة كانت الجمعة اللى فاتت بس مكانك محجوز اكيد ف الفرح ان شاء الله :)

الله يبارك فيكى و
عقبالك يا سارة :)

Psycho said...

7almty enk betgry !!
as7y w 7a2a2eh el 7elm dah
akeed 7atrt7y ketirr