Sunday, December 16, 2007

أثــــــر رجــعـــي


" أيوة فعلاً .. كلمتك جابت جون "

في ناس تعرفني . تعرفني كويس جداً ، بدرجة كافية تسمحلهم بأنهم يقسوا عليا ، و يقولولي كلام أنا أخاف أقوله لنفسي ، و أخاف أسمعه من حد تاني .
أنا مؤمنة تماماً إن الصراحة مؤلمة ، لكن أنا بابقى مستعدة إني أتحملها ، إن كانت الصراحة ملهاش أي غرض تاني ، .. غير إني أكون عرفاها .

و لأني عبيطة ، فأنا بلاقي انسجام عالي نسبياً ف كل حياة مش حياتي .. إتنين قاعدين بيتخانقوا ف كافيه ، أركِّز معاهم جداً و أراقب تقلبات تعبيراتهم الوجهية ... يكون لسة معاد امتحاناتي مجاش و أعدِّي قدَّام لجنة تانية ، و الي قاعدين عمالين يبصوا حواليهم و عايزين يغشوا ، و طبعاً الموقف بيبقى مسخرة ... و إني أسمع حكاوي صحابي اللي هيهة ساعات تكون تفطس م الضحك ، وساعات تانية تكون مآسي ...

و طبعاً ، طبعاً ... الأفلام .

أي زاوية انسانية تسمحلي إني أشوف الحياة كـ "صورة" ... أو كأني بتفرج الشارع م "البلكونة" ... أو كأني بتفرج على "فيلم" .


بكره الشكاوي الكتيرة ، اللي بتبقى شكوى لمجرد الشكوى ، مافيش أي حاجة تانية ممكن تتقال .. لكن أكتر شكاوي بقولها أو بسمعها ، وباعيش فيها فعلاً .. اللي بتبقى طالعة م القلب ، ووصلاله ..
أكتر شكاوي قلتها ف حياتي و طلعت من قلبي بجد ، كانت مع "مها" صديقتي الجميلة ، اللي بشيل من نفسي و أحط فوق دماغها .. (و هي ترمي ف وشي تاني بعد كدة ، مش مشكلة !)


و لما مرة كنت بشتكيلها ، ... من حاجة حصلت خلاص ، و كأنها لسة بتحصل دلوقتي ..

صدمتني و قالتلي " سارة .. إنتي عايشة بأثر رجعي "
تقصد إني كان ممكن جداً وقتها أحل المشكلة ، و أتكلم عنها ، و أعيشها فعلاً .. لكن أنا اللي بستنى .. و أتفرج على حياتي من قدام ، بعدد ما تعدي اللحظة ، و ييجي ألف غيرها وراها ..

كأني بتفرَّج على فيلم ..
مأجلة حياتي ، و بتفرَّج على اللي فات شوية

لحد ماتيجي"مها" تطفي التلفيزيون


23 comments:

Islam said...

3arwa howa enik teshoufy 7ayatek b 2asar rag3y aw ka2inek 3aysha f film dy 7aga kawaiesa bet7'aly mesh da3ifa f wa2t enty me7taga tekony kaweya w lama tefou2y yebtedy yerga3lik ana aftikr 7ad kan 3amal yed7ak 3alaya mara f exam men el exams :D lama ashoufha bs :D w about Maha ... i agree with u maha is one of the stragest girls i ever met te7esy en fiha contrasts kteer ana ba2oul aih 3moman eshteky sa3at el shakwa betraya7 :)

zeroeffect said...


تقصد إني كان ممكن جداً وقتها أحل المشكلة ، و أتكلم عنها ، و أعيشها فعلاً .. لكن أنا اللي بستنى .. و أتفرج على حياتي من قدام ، بعدد ما تعدي اللحظة ، و ييجي ألف غيرها وراها ..

أنا كمان كده بس المشكلة ان الطريقة دى مبتخليش الواحد يتعمل من غلطاته
يعنى تيجى تفكرى فى موقف و تسترجعيه لحظة بلحظة و تلاقيله الحلول و تقولى انا كان المفروض عملت كده و كلام من ده
انما الحقيقة ان الموقف دا لو اتكرر هو هو تانى مش حتعملى زياده عن اللى عملتيه أول مره

zeroeffect said...

BTW , you do have a very nice blog design :)

karakib said...

لو فعلا انت كده يبقي انت فنانه
انك تعيشي لحظات غير بتاعتك و تضيفيها لخبرتك و عمرك و تعبري عن ده
يبقي ده اسمه فن
دي حاجه اتكلم عنها الرائع الراحل صاحب المساحات الخضراء عبد الوهاب مطاوع
اسمها
ارجوك اعطني عمرك

Sara Swidan said...

Islam...

أنا ؟؟
أنا هية ؟؟ إللي كانت بتضحك عليك؟؟

أكيد أنا يعني ... لكن فكَّرني أكتر ، مش فاكرة !

آه .. مها .
ربنا يوفقها و يمسيها بالخير بقى و أنا عمالة أنتف ريشها دلوقتي بقى!

سلامتك ألف سلامك يا دؤدؤ ..
ملوحة

Sara Swidan said...

zeroeffect ...

أهلا أهلاً ..
بقينا زملاء بقى..

أنا فعلاً مش بتعلم من غلطاتي .. للأسف ..

زي المتخلفة كدة بوَّقع نفسي ف مشاكل أنا مش قدها .. و كلهم شبه بعض!

ف يوم من الأيام سيكتب لنا العتق من دوائر الأخطاء التي أدمنتنا

فرصة جميلة يا زيرو

Sara Swidan said...

zeroeffect... (continue)

التصميم .. من ابداع الفنان الصاعد الخطير الفظيع اللي مالوش حل ..
prozaaak

ربنا يكتبله الحرية بقى .. أصله مسجون ف قوقع داخل المحيط البسفيكي ..

شكراً ربنا يخليك (ي)

فرصة سعيدة وحياة ربنا

Sara Swidan said...

karakib...

أولاً : نـــوَّرتـــــنـــــي جــــــــداً
ثانياً : شكراً ع المجاملة الجميلة وحياة ربنا .. لو هوة دة الفن فعلاً ..

أبقى أنا عجينة متلخبطة على بعضها!
:)

شكراً ع المعلومة ..
بحب الكلام الثري ، بالمعلومات اللي فيه
!

كررها أرجوك ..
فرحانة جداً إنك زرتني هنا ف قهوتي المتواضعة !!

بجد

Maha ba2a said...

hi3 hi333......wlhi ma fakra oltlk kida emtaaaaa.....:D
anyway ana brdo m3aki bafta7 shababeky 3ala ba7aryyyyyy... we banshor kol 3'aseliii!
w aked momkn akwelek 3'aselik enty kman aw asa3dek feeeeh......but i sware that i'm so lucky to have you,as u r the most confortable i met bgd wlhi
bs,w bnd7rg eltamasy 3al ma3alem sa7eb el ahwa we sobiano
Maha El-ramal

camera_girl said...

حسنين ومحمدين بيتفرجو عالتلفزيزون فجأه جه هيثم طفى البوتجاز


كتير حاجات بتحصل فى حياتنا وتعدى وفعلاا نرجع نعيشها جوانا ونحاسب روحنا والى كان مفروض نعملو ساعتها

ونتعايش الحاله بأثر رجعى....وطبعا انتى عارفه مساوىء تطبيق اى حاجه بأثر رجعى....كان ضرورى يكون ف حياتك مها تطفى البوتجاز قصدى التلفزيون......حلو البوست ده!

Sara Swidan said...

Maha ba2a ...

مــــــــــــــــــهــــــــــــــا !!

والله ولا أنا فاكرة اللي أنا حكيتهولك ..

لكن الكلمة جابت جون !!

ربنا يخليكي ليا يا مها .. و يكفينا شر شياطينك اللي بيقوموا عليكي ، و يخلوكي تعملي حاجات غريبة كدة . جتك 60 نيلة إنتي كمان !!

إنتي جبتي النت منين؟ مش النت بايظ باين؟؟

المعلم و القهوة بيدحرجوا التماسي عليكي برضه ..

والحساب ع النوتة ، عشات إنتي حضرتك مش ضيفة .. و أنا قفايا عريض ما فيه الكفاية

:)

فرحانة جداً يا مها وحياة أمي

Sara Swidan said...

camera_girl...

إنتي مهايبرة على طول كدة؟؟

:)

ربنا يزيدك من الجنان (بجد) ..

أصله ميزة و نعمة جميلة حتلاقي الناس بتحسدك عليها

alzaher said...

ما عنديش تعليق على التدوينة الحقيقة
لكن كنت عاوز أشكرك على تشكيلة الأغاني اللي إنتي حاطاها على الجنب
بصراحة قعدت استمتع بيها النهاردة وأنا في حالة إنسجام
شكرا ليكي ولذوقك
:)

Sara Swidan said...

alzaher...

ياااة ..

إنت أول واحد يعلَّق على البوكس أصلاً ..دة أنا كنت خلاص نويت أشيله .

ربنا يخليك يا عمرو ،و يخليلي مجاملاتك الجميلة وحياة ربنا ..

إنت من الشخصيات الغنية الفريدة اللي عرفتها ف حياتي والله

نوَّرت ألف مرَّة

Foxology said...

اولا كل سنة وانتى طيبة وعيد سعيد عليكى وعلى كل الناس

ثانيا ساعات الواحد بيحتاج انه يشوف حياته كأنها صورة أو فيلم او حتى يشوفها من فوق كأنه بيتفرج من البلكونة على الشارع اللى هو ساكن فيه الواحد ساعات بيحتاج يعمل كدة يمكن عشان يفكر فى حياته اللى جاية ويتجنب اى اخطاء حصلت فى اللى فات ويمكن عشان يندم على حاجة هو عملها او يندم على حاجة مش عملها ودى اقصى درجات القسوة ... القسوة الذاتية أو جلد الذات زى ما بيتقال

مرة تانية كل سنة وانتى طيبة وياريت محدش يطفى التلفزيون للى بيفضفض معاه :)

Anonymous said...

asr rag3y..
3elm nafs waryah fi kol 7etah:D

3arfa fi 7agat bet3lem feky keda mish bet2der tetnasa.. w lama mattnasash yeb2a asret feky.. 7ata lw fat 3aleha 100 sana..mish 7at2dar tenseha..

ay kan ba2a 7agat 7elwa wala wa7sha
bas el 7agat el wa7sha betseb 3o2d w kalke3..

ana wa7da men el nas el aser el rag3y eli betklem 3ano dah 3amly kalke3 w 3o2d..:D:D

7elw ya bet el post da..
keeep goinnnng

Psycho said...

ana anon maghol el hawya a eli fo2 da

ana la7d delw2ty mish ba3rf ab3t pooooosssssst:@:@:@:@

Nsreen Bsunee said...

ساره مش عارفه ليه حاسه انى عارفاكى والجرامافون جامد اخر حاجه اوعى تشيليه بالنسبه بقى للبوست انتى جيتى ع الجرح الكبييييييير ودوستى عليه اوى بصى يا ستى انا اكبر منك بسنتين واسمعى منى كويس اوى انك تشوفى حياة البنى ادمين اللى متبعترين حواليكى او فى الافلام او فى اى داهيه بس فى حياتك وتجاربك الشخصيه امسكى كل موقف يمر عليكى ومتسبيهوش يعدى غير لما تفصصيه وتحليليه وتمصمصيه وتحددى موقفك منه عشان لو سبتى الامور تعدى كده اكيد حتندمى لما ترجعى باثر رجعى تفكرى فيها عيشى اللحظه اوى فى وقتها بحلوها ومرها واتصرفى صح او غلط بس فى نفس اللحظه وبعد ما تعدى عيشى اللحظه اللى بعديها اوكى انا مش حراجع اللوك لوك اللى انا لكتهولك ده حاسبهولك زى ما هو
وانا مبسوطه انى اتعبلت فى الكافيه بتاعتك يا ساره
سلام

Sara Swidan said...

Foxology...

وانت بالصحة و السلامة يا باشا!!
أنا بتعلِّم من أخطاء غيري أكتر من اللي بتعلمه من أخطائي ..

أصلي خوافة أوي

نوَّرتني يا باشا

Sara Swidan said...

Anonymous...

عقد إيه و كلاكيع إيه يا شيخة.. روَّقي دمك ، ساعة الحظ ماتتعوَّضش

:)

نوَّرتيني

Sara Swidan said...

Psycho...

هوة إنتي؟؟
و أنا عمالة اقوللك نوَّرتي و نيِّلتي ...

جاتك خيبة إنتي التانيه .. إنتي ماينفعش تبعتي بوستست هنا أصلاً .. تعليقات بس يا بُرَم

يللا امشي

Sara Swidan said...

Nsreen Bsunee...

الأرواح بتتلاقى ف ملكوت الرحمن يا طنط نسرين .. لكن يا ريت ماتحسسنيش إنك كنك بقى و اللي هوة بتنصح العكروته السفروته أم عضام طرية ..

بأمارة السنتين يعني .. ماشي؟
و لو إني يعني ساعات بحس إني مسؤولة عن اعطاء النصايح لناس كتير .. حتى ساعات بيكونوا أكبر مني أساساً ..

مبسوطة جداً إن الأغاني عجباكي وحياة ربنا ..

و الوقت يداوي الجرح الكبير بتاعك ، و شوية أكسجين .. و زفير سلبية ..

أنـــا حـــــــــرة said...

sara


انا ازاى ما جيتش هنا من زمان ، اهى دى حاجه من الحاجات اللى الواحد ممكن فعلا يزعل عشان معملهاش انما ملحوقه

بصى يا ساره انا عندى مشكلتك من وجهة تانيه بقى انى بسبق الاحداث يعنى بتخيل ردود الافعال و السكك شكلها ايه و دى كمان بلوى لانها مش بتحرق الاحداث على اد ما هى مابتخليكيش تستمتعى باللحظة

و اعتقد ان الحل بالممارسه حاولى كل تفكيرك يكون فى اللحظة اللى انت فيها
علشان انتى من غير وعى هتضيعى اللحظة دى و مش هتعيشيها و ترجعى بعد يومين تبكى عليها و هى ماضى