Wednesday, July 28, 2010

أوي .. أوي


بحب أوي إني أصحي شوية بدري قبل المعاد و أستحمى بمزاج كدة . و لما أفتح ضلفة المطبخ ألاقى علبة النسكويك بتضحكلي . يا سلام . و بحب الأغاني اللي بتعجبني ، و معرفش أساميها . و بحب أشرب لمون . و بموت بموت بموت ف البتنجان المخلل . و لما تنزل صنية الشاي و حد يصبلي كوبايتي . و يا سيدي ... يا سيدي لو حد حطلي سكر من غير ما يعرف إني مش بحط سكر ف المشاريب .

و الحمد لله إن في ناس لما تخبط فيا تقول : سوري و أنا كمان أقول ف نفس الوقت : سوري .. و ف نفس الوقت احنا الاتنين نقول : ولا يهمك . يا حلاوة . و بفرح أوي لما أغير رأيي فجأة و أقرر ماروحش الحتة اللي أنا كنت رايحاها . و بحب أشرب بيبسي و أنا باكل ، و أحس بيها لما تطرطش ف بؤي كدة من أول لحظة . و بحب الشباشب ، و الناس اللي بتلبس شباشب ، و الناس اللي بشحتف بالشباشب . بس كلة إلا إن الواحد يمشي حافي .

و موتي و سمي أصحى م النوم أدوَّر ع الشبشب . يا ساتر يا رب . و الأنيل بقى إني ألاقى فردة ، و التانية تبقى تايهة . لا لا لا . و مش بحب البصمات على أي حاجة ف الدنيا ، شاشة الكمبيوتر أو الموبايل ، و الأرف بتاع الموبايلات التاتش سكريين دي ، ربنا يقرفكوا . و لا البصمات على نضارات الناس ... يا ديني ع الاستفزاز . و مابحبش أبداً أبدأ ، أفتح علبة لبن ألاقيها بايظة ، أو تقع بيضة من إيدي ، و يبقى يوم منيل على دماغي و دماغ كل اللي يعرفوني لو اتكسر مني مج .

لكن بطير بطير بطير زي العصافير لما حد يجيبلي مج . يااااااه . مش ممكن . و كمان بحب أوي أوي أجيب مجات للناس ، ببقى واقفة ف المحل ببص ع المجات و محتارة أكني بشتري خاتم ألماظ مثلاً . ربنا يخليلنا البياعين طوال البال . اللي بيقولوا علينا مجانين ... ربنا يخليهملي . و بحب أوي الناس لما يبقوا جاعنين و يقعدوا ياكلوا كدة بزمة ... ناس شايفة شغلها . كمان الناس لما يبقوا عطشانين و أتفرج عليهم بيشربوا م الإزازة كدة و يقلبوا دماغهم على ورا . و الناس اللي ماتعرفش تشرب من غير كوباية ... بديلهم ضهري ... محناش ناقصينكوا يعني ...

و الناس اللي بتتكلم كتير ف التليفون ، خلاص اتعوِّدت اتجاهلهم ... و ياباي ... ياباي ياختي ع الناس اللي بتتكلم بصوت واااااااطي ي ي ي ي كدة و يحسسوني إنهم بيكلموني ، لكن ف الحقيقة هما بيتكلموا ف التليفون ... و ف الحقيقة لابسين هاند فري و هما مش في العربية ... و ف الحقيقة أصلاً ماعندهمش عربية (أومال جيبتوا أم الهاند فري ليه؟) ليه؟؟؟؟؟ احنا ناقصينكوا ؟؟؟؟ يا ساتر ... و الناس اللي بتأرأد ضوافرهم بفضل بصالهم كدة مستنية أفهم الجدوي من ورا هذه الحركة . و الناس بقى اللي يبقوا ماشيين بالراحة ف نص الرصيف ، ببقى مش عارفة أتصرَّف إزاي معاهم الصراحة ... و غالباً ما بطلع المفاتيح و أشخلل بيها كدة عشان يوسعوا . يعني ... هما ما يقصدوش طبعاً . زي برضة لما أبقى ماشية ف الشارع و حد جي ف وشي و نبقى عايزين نعدي من بعض ف نقف ف خلقة بعض و احنا الاتنين ناخد خطوة ف نفس الاتجاه و نفضل ف وش بعض و خطوة تانية ف الاتجاه التاني و نفضل برضه ف وش بعض . و بعدين نقرر نقف و نسيب الشخص التاني يعدي ... ف نفضل واقفين ف وش بعض ... أظن نتعرَّف بقى و نقف ندردش شوية لحد مانشوف هنطلع من الحفرة دي امتى ...

كلها حاجات جميلة ... تنرفز ... بس جميلة كدة و تضحك الواحد من قلبه ساعات .
هي هي هي ... أنا طلعت هبلة باين ...

و بحب الهُبل اللي زيِّي ... بس الناس اللي بيحاولوا دول ... آدائهم مفتعل كدة و مش مبلوع ... لكن المحاولة أم الخطأ و التعلُّم معلش ...
بكرة يحترفوا و يبقوا كدة ... حبة فوق حبة تحت ...

حسة إني ماقلتش كل حاجة الصراحة ... كله راح من نافوخي و أنا بفكر

يللا كله بيولِّي ... فينك يا متولي ؟؟؟

صباح الفل ع العيون الحلوين

12 comments:

راجى said...

صباح الخير على عيونك

dodda said...

wallahi enti bgad sokar zyada

we ana ba7ebek awi

أحمد يحيى said...

حدوتة مصرية..
مش عارف ليه كانت بتزن في وداني وأنا بقرا البوست..
بس حدوتك محلية شوية..
لكن.. تأثير قرائتها عـ الصبح كده عمل معايا نفس مفعول مج الكابوتشينو بالظبط.

ميرسي ياسارة.

زهرة المطر said...

يا صباح الجمال :)

بوست ليه طعم اوى :)

youssef said...

:)

دا تدوين

ايوه

:)

Marionette said...

I LOVE , I LOVE , I LOVE !

t3ban said...

يدوم ويبقي و ماينقطع عنك ود الحياة
تحياتي
أوي أوي

إبتسام مختار said...

و الحمد لله إن في ناس لما تخبط فيا تقول : سوري و أنا كمان أقول ف نفس الوقت : سوري .. و ف نفس الوقت احنا الاتنين نقول : ولا يهمك

صباح الخير :)

Timo.. said...

عارفة يا سارة..
مريت من هنا..
وعجبني البوست..
احساس عامل زي نكهة النعناع في الصباح..
الكلمات بتدخل بسرعة بسرعة..
بتعدي على الدماغ بدون عناء او مجهود يذكر..
فا قولت اتابع باقي البوستات عشان اتعرف عليك اكتر..
لقيتني قضيت امبارح بالليل ونص النهاردة ..عندك..!!
عاجباني طريقة سردك البسييييطة قوي دي :)
وعجبني كمان البوست اللي فات (متعة الاستسلام) :)

Timo.. said...

كل سنة وكل رمضان وانت بكل الخير :)

mohamed soliman said...

الله ع الحالة الجميلة اللي رسمتيها بتلقائية شديدة وبساطة خلتني مش قادر ما أسيبش الشغل اللي ف ايدي و ما اقعدش اكمل معاكي لحد الاخر
بجد يا سارة ميرسي خالص ع شوية الصور اللي نقلتيها زى ما هيا ف حياتك و احيى فيكي الانسانة الاجمل اللي عملت ده
على فكرة انا كمان باخد وقت طويل اوي عشان اجيب اى حاجة اصلا واقعد انقي كاني بجيب حاجة فظيعة و ممكن تكون باكو شيكولاتة اصلا

totahabib said...

الله الله ...يا عينى على التلقائية والكلام اللى طالع من القلب اول مرة ادخل مدونتك بس حبتها اوى بسبب البوست ده ^_^
احنا فى حاجات مشتركة بنا كتير
وخصوصا حكاية سورى و ولا يهمك دى حلوة اوى وبتفرحنى انا كمان اوى
انا بحب اقول سورى للناس بعفوية كده وبدون تكبر حتى ساعات بيبقى الواحد هوا اللى خبطنى ولا دايس على رجلى فانا اتخض واقول >> سورى فيضحك هوا عليا ويقولى انا اللى سورى
XD
ايه اللى انا كتبته ده كله?! (( O.o ))
اه صح رمضان كريم :)