Wednesday, April 9, 2008

اذكـــــرونـــــي



مش ممكن أزعل طبعاً ..

مهما حصل ..

طول ما حواليا ناس زي دول ...



إســـــــــــــــلام اللي جابلي فيلم "بوحة" .. لمجرد إني بقالي مدة بتكلِّم زيه . و اديتله الـ سي دي تاني ، و ما أخدتهوش ..
مــــهـــــا اللي أنا بعتها و مارحتش مشوارها معاها .. و شوية و لاقيتها بتبعتلي إس إم إس .. آل إيه بتصالحني . (على أساس إني أخدت بالي و هية بقفش عليا )
لــــــمـــــيـــــس اللي استهبلت شوية .. و لما رحت عشان أديها كلمتين ف جنابها .. راحت دفسة حتة بيتزا ف بقي عشان ماتكلمش .. "اتعدلي يا ماما !".. و اللي أنا بعتبره نوع من أنواع التصالح .. النوع الأقرب لقلبي الحقيقة ..
مــــــــــــــــروة طنشتني .. و لما كلمتني قالتلي حتشرحلي اللي فاتني مادة كدة عندنا ..
و شــــــــــــادي اللي جابلي مصاصة عشان أرضى عنه يا عيني ..

خايفة والله أكون ناسية حد ..

لكن أنا مش بكرَّم الناس دي تحديداً ..

أنا بس عايزة أقول إني بحب حياتي جداً .. أنا أكيد مسبقاً باخد مكافأة حاجة حعملها ف يوم م الأيام ...بالناس اللي حواليا دول ...
و ساعات بحس إني بتوهِّم حاجات ..

و بحس إني ما أستاهلهمش ساعات ..

لكن أتمنى إني أفضل كدة . أنا مش هما . حسة بيهم أوي و ممنونالهم ..




أذكروني ..
أذكروني ..

أبقى طفلة للأبد

22 comments:

Islam said...

masasa ha.... mana 2olt bardo... bs mardetsh 2a3ala2 3ashan maloush fayda... bs 3ala fekra ya sara bel nzeba lel nas dy dah mesh she3our gameel zay ma enty shayfah... so try not to push it... they may got bored or in dispare.. don't count on luck :)

With Myself said...

صباح الروقان ;)

Foxology said...

معرفة الناس كنووووز لكن مش اى ناس الناس اللى بجد اللى فيهم احساس بينا

بوست جميلة يا سارة ربنا يحببكم فى بعض :)

مصطفى السيد سمير said...

يا رب
تفضلي طفلة للأبد

ممكن
لية لأ

راجى said...

احنا بنكبر وجسمنا وشكلنا بيتغير لكن ارواحنا بتفضل زى ما هى
تحياتى وربنا يكتر من اصحابك

alzaher said...

يا بختك بمن حولك
:)
بس إنتي مش طفلة
إنتي من أكثر الذين عرفتهم نضجا

Sara Swidan said...

Islam ...

يا ساتر استر يا رب

!!

Sara Swidan said...

With Myself ...

صباح الفل

Sara Swidan said...

Foxology ...

ماهوة دة اللي بيخليهم كنوز ..

إن احنا مش دايماً شايفين دة

Sara Swidan said...

مصطفى السيد سمير...

ممكن أكيد ..

Sara Swidan said...

راجى ...

بالضبط ...

بل إحنا ممكن نصغر أكتر كمان ..

Sara Swidan said...

alzaher ...

شكراً يا عمرو ..
بس مش قصدي نضوج أو كدة ..

أنا قصدي الروح دي ..
إني أفضل حسة إني طفلة .. لحد ماتيجي فرصة أتصرَّف فيها زي "بنت كبيرة" ..

صعب الرقص ع الحبلين ..

Anonymous said...

الطفلة المدللة

اكيد احساسك جميل وحماسى
بس عايز اقولك ان اكيد انت قدمتى السبت والحد عشان كده لاقيتى باقى الاسبوع عند الناس
جدتى دايما تقول اللى ربنا يحبه يحبب فيه خلقه

عصمت

Sara Swidan said...

عصمت...

تفتكر؟؟

أتمنى ، لكن من ناحية تانية أتمنى العكس عشان أفضل مترقبة الشيء الهايل اللي حعمله في مقابل اللي ناس بتعمله معايا!!

كلمتك . بجد ، مطمئنة جداً ..

مبسوطة أوي إني شفتك انهاردة

مُزمُز said...

أنا أكيد مسبقاً باخد مكافأة حاجة حعملها ف يوم م الأيام ...بالناس اللي حواليا دول ...
.........

ده هو ده قمة الصفاء النفسي والرضا
مش حسد

بس يا بختك جدا

متهيألي لو ده شعور استمر

يبقى مش صعب أبدا تفضلي طفلة إلى ما لا نهاية

:)

محمد صبحى said...

عايزة تفضلى طفلة على طول
صعبة شوية
بس ممكنة

P=S=Y=C=H=O said...

Enty maynf3sh teb2a 7aga tany 3'er 7'ory bory:D

Sara Swidan said...

مُزمُز ...

ربنا يخليك وحياة ربنا ..

لو هوة دة المفتاح ..

أنا مستعدة إنى أفضل شايلاه قدامي طول الوقت

Sara Swidan said...

محمد صبحى ...

أنا كمان شايفة كدة ..

لكن الإيد البطالة نجسة ..
أدينا بنحاول ..

Sara Swidan said...

P=S=Y=C=H=O ...

طبعاً دة ختم النسر يامو سحلول...

د/اجدع بنوته said...

مصاصه وبيتزا وبوحه

عرفينى عليهم فورااا الناس اللى زى السكر زيك دول

طبعا هيفضلوا يتذكروكى وهتفضلى طفله جميله للابد

Sara Swidan said...

د/اجدع بنوته ...

أنا مش ممكن أبيعهم ..

لكن أنا و إنتي ممكن نعمل عليهم شركة ..

:)

أنا أصلي أصيلة جداً زي مانتي شايفة كدة ..