Tuesday, March 4, 2008

دلـــوقـــتـــي



ممكن أكون حزينة جداً دلوقتي ، لكن أكيد بعدين حعرف إن التجربة دي كانت من أجمل الحاجات اللي عملتها ف حياني ..
و أنا عارفة كويس أوي إن الناس اللي عرفتها ، هي الجايزة الحقيقية !

واللي مش عارف أنا أقصد إيه .. أنا حقوله : "أنا من العشرين اللي استبعدوا من ورشة السنيما و صناعة الأفلام لسنة 2008"

و كان في يوم من أيام الورشة أنا كنت محبوسة فيه ف مكان واحد (المسرح الايطالي) لمدة 9 ساعات تقريباً .. لكن كان أول يوم أكون فيه ف مكان واحد لكل الساعات دي .. لكن من غير ما أزهق ، و بمتعة لم تنقطع لساعات ..

و دة ف حد ذاته تجربة جديدة .. أنا حسعد بيها ..

إنما دلوقتي ..
أنا حزينة .
حزينة أوي ..

32 comments:

Anonymous said...

من حقك
و بصراحة مش هاقولك ماتحزنيش , هاتبقى دعوة كدابة و عدم إحساس من الاخر
أنا اللى مخلينى كمان مش عايزة أقولك ماتحزنيش..إنى عارفة إنك هاتقومى بعدها ..مش عارفة بسرعة ولا بعديها بمدة ؟ لكن هاتقومى و ترجعى تتنطتى ..
:)
فلازم تاخدى قسطك من الحزن ..علشان تعرفى تفرحى بعديها بجد من غير أى ذرة حزن ..

و المرة الجاية ..تبقى الأولى ..
ماحدش عارف ربنا شايله إية ..فين ..و إمتى

:))

Anonymous said...

قلبي معاكي
لكن زي ما قلتي تجربة جديدة
ودايما النجاح بيسبقه فشل او اتنين
حظ احسن و مستقبل اوسع

Tomorrow

Prozaaak said...

عارفه يا ساره .. انا ليه واحد صاحبى غاوى تمثيل جدا .. صاحبى ده قدم لمعهد فنون مسرحية تلت مرات على التوالى .. كل مره يدخل الاختبار ويقعد جوه فوق النص ساعه - وده وقت المفروض انه كتير جدا - يفضل سناء شافع وجلال الشرقاوى يجيبوه يمين شمال ويقعدوا يقولوا انت فنان كويس انت موهوب يابنى .. وكل مره يخرج من المعهد متأكد انه اكيد بعد ده كله نجح .. تطلع النتيجة ويصطدم بالواقع !!

اللى عاجبنى فيه جدا انه بعد تلت مرات .. لسه بيسعى فى الموضوع مابطلش ون ورا الورش وشركات الانتاج .. هو واخد الموضوع جد وعايز يوصل

يعنى ... اهم حاجه انك تقدمى السنة الجاية تانى ...ومتزعليش ...
مافيش حاجه بتيجى بالساهل

Anonymous said...

زعلانة ليه يا سارة؟
احنا استفدنا كتييير اوى و عملنا صحاب جداد
ان شاء الله ندخل تانى السنة اللى جاية
بس عايزين نبقى تتقابل كتير و نقعد فى الجزويت علشان نفتكر الاسبوع الرائع ده
ولو نقدر نعمل مع بعض حاجات فنيةزى اللى عملناه فى المسرح يوم الجمعة و نروح مع بعض الحفلات
و لا ايه رأيك

د/اجدع بنوته said...

قدر الله وماشاء فعل

اكيد باذن الله ده خير ليك

ورب ضارة نافعه

ربنا يعوضك ان شاء الله

واهو كويس جربتى تجربه جديده

تحياتى

Foxology said...

حمد الله ع السلامة يا سارة واكيد التجربة مفيدة مهما كانت نتايجها ومش هقولك بأة انتى عارفة >>> شوف نص الكوباية المليان

سلام :)

m.sobhy1990@gmail.com said...

مساء الفل عليكى ياسارة بجد مش عارف أقول لك إيه
لكن حاولى تاخدى من التجربة دى أحلى مافيها
وأنا على فكرة من الناس اللى مش بتعرف تقول كلام "مواساة" لكن اللى أنا متأكد منه إن الحياة شايلة لك حاجات حلوة كتير مسيرها هتفاجأك بيها
بس إنتى خلى عندك أمل فى ربنا
"من غير حلم الدنيا تفنى
من غير أمل الخوف يكتفنا
من غير خيال خيالنا يوقفنا" على فكرة أنا ناوى أقدم فى معهد السينما بعد ماأخلص دراسة الهندسة ربنا معاكى ومعايا

Salma El Banna said...

ايه يا بنتي ولا يهمك يعني
خيرها في غيرها
انت يا سارة لسه صغيرة اوي
في الكلية لسه وقدامك حاجات كتيرررررررررررررر تعمليها ان شاء الله ومين عارف حتكون احسن كمان من ورشة السينما
بعد التخرج الحياة بتختلف اوي على فكرة

Solo said...

لا داعي للحزن .. سرعان ما سيزول .. و تبقي التجربة و الأشخاص الجدد و الخبرة كما ذكرتي .. و خيرها ف غيرها بإذن الله

Sara Swidan said...

مــهــا ...

شكراً يا مها على تعليقك ..و اهتمامك

Sara Swidan said...

Tomorrow...

كلامك مظبوط ..
شكراً ع الزيارات المتكررة

Sara Swidan said...

Prozaaak ...

ربنا يقوي ايمانه بنفسه ..
لكن أنا مش بالشجاعة دي عشان استثمر سنين من عمري ف محاولات يائسة لعمل حاجة .. انا أصلاً مش متأكدة ني عايزة أعملها للدرجة دي ..

و أخاف برضة يختلط عليا الأمر بين الاصرار .. و العند ..

Sara Swidan said...

شادى جمال ...

ربنا يدينا طول العمر للسنة اللي جاية يا شادي ..

أنا اهتماماتي بتتبدِّل ..
كنت أتمنى ألحق نفسي و أنا طازة

Sara Swidan said...

د/اجدع بنوته ...

على رأيك ..

شكراً على تعليقك

Sara Swidan said...

Foxology ...

مش شايفة الكوباية أصلاُ دلوقتي ..

أنا بحسس

Sara Swidan said...

محمد صبحى ...

شكراً يا محمد

اهتمامك كفاية

Sara Swidan said...

سلمى البنا ...

ربنا يسهل بقى ..

أنا فين و التخرج فين ..

ادعيلي بس!

شكراً والله يا سلمى

Sara Swidan said...

Mahmoud...

شكراً لاهتملمك يا محمود وحياة ربنا

و ألف مبروك

حصان بري said...

:)اول مره اشرب القهوه الزياده
مش عارف وصلتلها ازاي بصراحه
بس بجد لذيذه

ممكن التأخير يبان سيء جدا
بس اكيد هيغير فيكي كتير
هيخليكي مصممه اكثر علي النجاح
يمكن في حياتك كلها مش في الموضوع ده بس
وزي ماقلتي عرفتي ناس كتير كويسه
ودول لوحدهم اعتقد مكسب مش قليل
تحياتي يا ساره واعتقد دي مش اخر زياره
شكرا علي القهوه:)

Prozaaak said...

فقط احذرى من الاستسلام المبكر
واغرفى ان المجال ده تحديدا عايز كتير جدا من المثابره

P=S=Y=C=H=O said...

Man talba el 3ola sahar el layaly ya sara
lw el 7agat eli 3ayzena teglna bi sor3a begad mish 7an7es bi 2emtha
lazeem tet3aby
aw2y nafsak el sana di w 7awly tany w talat
dont give up
enty fa3ln mawhoba
w akeed mish bageml 3ashan o7'ty w bet3:D ana batklem bigad

الفارس الملثم said...

حقيقي مدونة اكثر من رائعة وساحرص علي متابعتها

لكي مني خالص التحية

الفارس الملثم said...

اه عجبني جدا الجرامفون وقمت بنقله لمدونتي...

Sara Swidan said...

حصان بري...

شكراً وحياة ربنا أنا ليا الشرف ..

لكن يسعدني إني أعرَّفكم ..

إني خلاص ..

خفيت

Sara Swidan said...

Prozaaak...

إنت حطيتلي الأغنية يا شرييييييييييييييييف؟؟؟؟؟؟؟؟

ميرسي ميرسي ميرسي ميرسي....

Sara Swidan said...

P=S=Y=C=H=O...

متشكرين يا حجة !!

بكرة أديي الورقة اللي بعشرين اللي اتفقنا عليهم عشان الكلمتين دول !!

:)

شكراً يا أميرة

Sara Swidan said...

الفارس الملثم ...

شكراً والله على كلامك الجميل ..

أنا ممكن أتغرّ والله

أنا ليا الشرف

Unknown said...

قضى حياتة يدور عالكنز

وفى النهاية اكتشف ان الكنز كان فى الرحلة

Sara Swidan said...

واحد مش فاهم حاجة...

أولاُ الاسم هايل..

و الصورة تجنن...

والكلام : مظبوط بالمسطرة !

شكراً على تعليقك و اهتمامك

Bahz.Baih said...

سارة تعرفى شريف زهيرى
هو من قدم على نفس الورشه السنه اللى فاتت ..ز كان المفروض يبقى مع مجموعه بلال و لكنه متقبلش... أتصرف و كتب فيلم و قرا و أخرج فيلم .. أتفقنا أو أختلفنا عليه .. بس الفيلم كتكنيك حلو جداً
دلوقتى شريف أقدر و بكل شجاعه أقول انه احسن من ناس كتير دخلت الورشه و طلعت من غير حاجه
السؤال بقى ... ياترى انت ممكن تخللى الزعل ده طاقه ايجابيه و تقوللى و لو بعد حين للى مقبلوكيش ... انتوا كنتم غلطانين ... انا فنانه عظيمه... و لا خلاص هى كانت ايام و عدت و انا جربت يمكن كانت تضرب معايا

Sara Swidan said...

Bahz Baih...

آه سمعت عنه طبعاً...

مش عارفة يا بهظ .. الموضوع مش تحدي والله يا بهظ ..

لكن لسة في ورشة جديدة هيعملوها ف قصر التذوق .. هقدم فيها ..

على فكرة أنا داخلة الورشة أبيض خالص .. مافهمش حاجة ف السينما ..

مش حعتبر إن اللي حصل ف الورشة دة دافع .. إلا إذا كنت أعرف فعلاً .. يعني إيه صناعة أفلام .. و بعني إيه صورة و ألوان ..

دة غير إن أنا ماكنتش داخلة عشان أكتب قصة أفلام .. أنا شكلي زهقت من تأليف القصص ..

مش عارفة والله يا بهظ؟؟

و إيه أخبار بنجلاديش؟؟

Yasmine Adel Fouad said...

فكرتينى بمنى ذكى فى فيلم " عن العشق و الهوى " لما كانت بتقول لغاده عادل انا زعلانه م الدنيا يا فاطمة .. زعلانة اوى


حقك تزعلى بس لما الدنيا تيجى تفاجئك و تصالحك خليكى جدعه و اقبلى هديتها و قولى مسامحاكى