Friday, February 8, 2008

قـــط ... مجرَّد قــط ، قــد يـكـفـي


القطط جزءلا يتجزأ من حياتي . أو حياتي قبل كدة و أنا صغيرة .

لكن دلوقتي القطط وحشتني جداً ..ف الشتا ممكن أصحى ف نص الليل على
"Happy"أو "Pussy" أو " Orangino"
و هو\هي جايين يتسحبوا عشان يناموا تحت البطانية أو على رجلي فوق البطانية .

وحشتني تمسيحة القطط ف رجلي و أنا واقفة ف المطبخ ، و طلوعهم على السفرة ياكلوا من طبقي .. ولعبهم مع بعض وسرقتهم للأكل من بعض ..
. "Orangino" الحنين
اللي كان بتجيلوا حالة كدة تخليه يجي لأي حد ، و يعض ف زرار البيجاما ويفضل كدة لحدما ينام .(كان بينام على ضهره زي البني آدمين)

"Happy" ابن الباشا
اللي احنا كنا بنشتغل عنده ، نأكله و نشرَّبه ، و هوة يتعالى علينا ، و ننده عليه يدوَّر وشه ، و يحرَّك ودانه .. اللي هوة "عايزين إيه مني .. مش كفاية بتنادوني ب اسمي حاف !!"

"Pussy"حبيبة قلبي
اللي لاحظت تغير شكلها و نظرة عنيها و طباعها معانا .. بعد ما حملت و ولدت .. و بطنها و هي بتتحرَّك بالقطط اللي جواها ، و هي ممددة على الغسالة ف الشتا و السقعة ..

اللي مفكرني بيهم بقى .. "happy"
اللي رغم غروره و عوجانه .. كان لما أنا أبقى عيانة أو حاجة بتوجعني ، ييجي يقعد على ضهري ..
و لما أكون بعيط .. يجي يتشاقى قدامي ، و يتشقلب ، و يلعب ب طرف كمي ..

و بالليل و هوة نايم ، يمد إيده يحضن رجلي ..

ساعات ..
القط بيتفوَّق على الرجل .. من ناحية التوازن ، و التواجد ، و التعاطف

الصورة : قط غادة و نهال
"Ginger"
لكن مش عارفة مين اللي ساندة عليه ..
برضه قط متعاطف ، و مرحب هايل بالضيوف ..


22 comments:

Ahmed Al-Sabbagh said...

:)
:)

��� ������ ����� ��� ��� ���

������� ��� ������ �� ��� �� �� ����� ��� � ��� ����

����������

�� ��� ����� ����

���� ������

���� ���� ��� ����

���� ������

����� ����

:)

�� ����� ��� � �����

�������

���� �� ����� ������

���� ������ ������ ���

���� ������

���

Cleo said...

العزيزة قهوة زيادة..

قد ايه كنت حاسة بسعادة غامرة وأنا متنحة قدام المونيتور والابتسامة من الودن دى للودن دى وأنا بقرأ مداخلتك :)

أنا من حوالى سنتين بس كنت أكرههههه حاجة اسمها قطط.. ولو سمعت اسمهم بس جسمى كله يقشعر... لحد ما دخلت بيتنا أول قطة.. كانت صغيرة وعندها شهر ونص.. رمادى لون الفيران.. بس أخلاقها أخلاق برنسيسات..أليطة جدا وكرامتها فى السما... نظيفة وحسيسة عمرها ما توقع حاجة ولا تضايق حد ولا تسرق أكل..

بعدها شوفت قط مشمشى شيرازى جميل محبوس فى قفص فى محل.. جيت ألاعبه لقيته متشوق للشقاوة والحنية.. على طول راح ماسك إيديا وقعد يعضعض فى صوابعى من الحب.. صعب عليا الجمال والحنية دول محبوسين فى قفص.. اشتريته و"حررته".. قط رغم غباوته إلا إنه قمة فى الحنان وعمره ما يغدر.. بعدين ابتدت تعجبنى فكرة القطط العيمالايا تشوكليت لحد ما عترت بصعوبة على واحدة فى محل... اشتريتها..قمة فى العفرتة...شقية جدا ووشها كله براءة ولبطنة وغباوة... تشوفيها تفتكرى المثل اللى بيقول "غشيم ومتعافى"

لكل قط شخصيته المستقلة وميوله وبيحبوا ويتعاطفوا ويغيروا ويزعلوا ويصالحوا.. زى الأطفال بالظبط.. بس الفرق إن القطط عكس ما بيتقال عنهم... مش ناكرين الجميل وعلى قد ماتديهم حب يدوكى...

Nsreen Bsunee said...

انا كمان عندى قطه
"لووكا"

لما نزلت الاجازه كنت متوقعه انها مش حتفتكرنى لكن فاكرانى ومش مستغربانى زى ما بتتعامل مع الاغراب رغم انى بقالى 8 شهور مشوفتهاش

Sara Swidan said...

Ahmed Al-Sabbagh...
أنا آسفة جداً لكن تعليقك ظهر علامات استفهام ...

ياريتك تبعته تاني !

و شكراً جداً ع التعليق على أي حال ..

Sara Swidan said...

Cleo ...

يعني عندك 3 قطط دلوقتي مش كدة ؟؟

واضح إنها لعنة ! :)
بكره يتجوِّزوا و يملولكوا البيت قطط بتزأزأ .. لو ماكانش دة حصل فعلاً !

مش غدَّارين أبداً .. اللي بيقول كدة بيبقى مارباش قطط أساساً .. أو أسوأ : مـــربــي قــــطــــة و مـــاحـــبـــهــــاش !

إنتي ممكن تربي حيوان و ماتحبيهوش؟؟

لو دة ممكن يحصل .. يبقى حتفضل الناس يقولوا القطط غدَّارة

نوَّرتيني بجد ..
استمتعت فعلاً و أنا بقرأ تعليقك

كرريها

Sara Swidan said...

Nsreen Bsunee...

كلكوا عندكوا قطط؟؟
و أنا اللي زدَّعت القطط للأبد؟؟؟

"لووكل" اسم جميل والله .."لوووووووووووووكاااااااااااا" !

:)

أنا كمان..

happy
لما سبناه و سرحناه .. كنت فكراه حينسانا .. لكن ماقدرش ... و فضل يمشي ورانا لما ننزل الشارع .. لحد ما مامي قالتلي طلعيه تاني ..

كان أحلى يوم ف حياتي ..

alzaher said...

سارة
وصلتني رسالتك
واهلا بيكي في أي وقت
:)
على فكرة ، فيه حاجة في نفس اليوم في مكان إن شاء الله
إبقي كلميني
:)

Sara Swidan said...

alzaher...

صحيح يا عمرو ؟؟

حكلِّمك أول ما هوصل .. احنا أكيد جايين .. أنا و غادة و نهال . و اخواتي ..

لمة يعني مش بطالة ..

إنت مدرك إن دة حلم من أحلامي؟

حكلِّمك أول ما هوصل

محمد صبحى said...

ماتفكرينيش والنبى ياسارة علشان كان فيه زمان قطة أنا بحبها قوى زمااااان...لكن فى النهاية راحت ضحية سواق متهور.بجد لحد دلوقتى فاكرها . بس ياترى احنا فى مصر عندنا اهتمام بالحيوان أو أى مراعاة لشعور الكائن ده؟...سؤال أسيبكم تجاوبوا عليه

أحمد منتصر said...

ساعات ..
القط بيتفوَّق على الرجل .. من ناحية التوازن ، و التواجد ، و التعاطف

مش أوي كده :)

Cleo said...

بس كدة.. ده أنا خلاص بقيت مدمنة على قهوتك اللى أحلى من قهوة سوفيانوبولو فى وسط اسكندرية :-)

وياريت تشرفينا فى مدونتى المتواضعة ولول اننا هناك بنشربها عادة سادة :-)

Sara Swidan said...

محمد صبحى...

معلش يا محمد ! مش بحاول أتعاطف معاك لما حقوللك : "إنك لو كنت بتتعاطف مع الحيوانا و بتهتم بيهم .. ف دة دليل أكيد على إن في غيرك . كتير. أكتر مما تتوقع ..

بس !
شكراً بجد ع الزيارات المتتابعة

Sara Swidan said...

أحمد منتصر...

ممكن تكون الجملة المطلقة غلط . و غلط غبي يعني ..

و عشان كدة أنا قلت "ساعات" ..

ساعات .. ابتسامة ناعمة من بين شعيرات دقن نابتة ، قد تفوق المعاطف و القفازات و الاقداح في ابعاث الدفئ في أوصالي

حلو كدة؟
شكراً ع التعليق نوَرتني بأول تعليق ليك..

Sara Swidan said...

Cleo...

يكرمك ، و يطعمك ما يحرمك يا أختي !!

شكلك دماغك بايظة زي حالاتي ..

و أكيد بلوجك هايل كمان ..

زالله حاضر حزور المدونة . كنت حزورها من غير ما تقولي وحياة ربنا ..

بس النت عندي بطئ .. حتى ع البلوج بتاعي هنا

شكراً ع الزيارات المتكررة والله مش عارفة أقوللك إيه؟

راجى said...

انا معاشر القطط طول عمرى واول قطة دخلت بيتنا من زمن طويل وكان اسمها كيشانة
واختى حاليا عندها
عسلة
شاكيرا
كمونة
ابو الليل
واللى يراقب القطط فترات طويلة زى يحس ان كل قطة لها شخصية مختلفة زى انتى مالاحظتى بالضبط
تحياتى

Sara Swidan said...

راجى ...

دة صحيح يا راجي .. القطط بني آدمين جرالهم
incarnation

شكراً على تعليقك . أنا بحب مدونتك جداً وحياة ربنا !

واضح إن كل اللي بيعلَّقوا عنهم شيء يقولوه عن قططهم

صوت من مصر said...

مش عارف اقولك بس ربنا يسامحك لانى بخاف من القطط ومبحبهاش للاسف

Sara Swidan said...

صوت من مصر...

أعرف ناس كتير كدة ماتخافش !

و ماتزعلش مني .. بيضحكوني جداً ..

إيه الممكن ف إيد القطة إنها تعمله عشان تأذيك؟؟ تخربشك ؟؟ عادي يعني . تعويرة زي أي تعويرة !

معلش يابني .. ف يوم من الأيام ممكن تنام و تصحى تلاقي قطة نايمة على رجلك ، و تصحى تقول القطة ممكن تغني عن أي ست !

:)

شكراً على تعليقك وحياة ربنا

coca said...

يعني اخلص مكالمه مع واحده صحبتي عن الكلبه بتاعتها اعدت توصفلي ساعه هي بتعمل معاها ايه ولهيب المشاعر المتدفقه اللي بينهم اجي الاقيكي مع الققط

احيانا بيكون اصدقاء بيحسوا بيكي

والغريب انهم بيحاولوا يخرجوكي من حالتك لو زعلانه مثلا

انا كان عندي كلب للاسف ماما اخدته مني
تحياتي
مدونتك شيك اوي اوي اوي عجباني من زمان بس غلبت لحد ما عرفت اوصلها تاني

Sara Swidan said...

coca...

إسمك هايل!
ولسة .. ياما حتشزفي من صاحبتك من كلام عن الكلب بتاعها في مواقف كتير و عشوائية ..

ميرسي والله ع الكلام الجميل يا كوكا .. دة كلة تصميم
prozaaak!

حتلاقي ابلوج بتاعة ف السايد بار "أصدقاء طلعولي ف الفنجان "

شكراً على تعليقك وحياة ربنا

ســمـــر احمد said...

قطة يعنى شقاوة و حنيه و طبطبة ساعة خنقة
وصحيح بسبس قط مصيبة .. لكن كفاية بيخلينى لما ابص فى عيونه اللى عسلها بيلمع زى الدهب السايل فى الشمس اقول سبحانك يا رب

Sara Swidan said...

ســمـــر احمد...

يا بختك يا سمر!!

ماتفكرينيش أرجوكي ..

نوَّرتي البلوج وحياة ربنا