Tuesday, December 4, 2007

أحـــلامي ... 2





نفسي واحد أسمر يِلِّـمنا ..
ف قعدة دافية ، و كراسي خشب .. أو قاعدين ع الأرض ،
و بالدف بتاعه يدق ..

و كلنا نغني ، كلنا ، "عصفور " *..
و نصدح كلنا بالأصوات النشاز :
"ولكني بحس اكمني عاشق لزماني اللي تاعبني ..تاعبني
آآآآآآآآآآآآآآه .. تاعبني"

نغني .. و نغني .. و نغني ..

و نضحك لحد ما نفطس ..
و نطلع بأغاني تانية نغنيها.

نفسي دة يحصل قريب .. و مين "احنا" بقى اللي حنبقى قاعدين ، ف دي فعلاً . فــــعـــلاً . مش مشكلة نهائي .
المهم .. إننا كلنا نكون عارفين الأغاني ، و مش مكسوفين من بعض..


* الأغنية موجودة ف الجرامافون ع اليمين

39 comments:

CoOl GuY said...

hmmmm ya rietik kont ma3ana f luxor kan mawgoud walahy at least one of ur dreams whould done... ya 7'osara

Sara Swidan said...

Islam ...

عارفة واله يا اسلام ..

لكن أهه ... هنعمل إيه؟؟
أنا أكيد مش حموت قبل ما أروح الاقصر و اسوان ..

و لو مت.. حبقى أقولهم بقى يفسحوني قبل ما أوصل فوق خالص

:)

شكراً يا دودي !
ع التعليق.. و الصراحة

مصطفى اسماعيل said...

مدونة جميلة
اول مرة ادخلها
بس عجبتنى

البوست بسيط وجميل


على فكرة
اللى حرف اغنية شبابيك يستنى منى محاولة اغتيال فاشلة كعادتى

ده من احب المقاطع عندى

ربنا يسامكم
:)

Foxology said...

حلوة اوى البوست دى يا سارة وفعلا مش مهم احنا مين اللى هنكون قاعدين المهم نكون حافظين الأغانى ومش ننكسف من بعض :)

سلام

The Alien said...

حلم جميل
والجميل فيه إنك عايزه ناس تشاركك فيه
وصدقيني حلمك ممكن تحققيه
لإن فيه ناس كتير عارفة الأغاني

تحياتي

روابط said...

العبد لله زار الأقصر واسوان 4 مرات , وكانت زيارات لا تنسى , ويكفى بساطة الناس هناك وطيبتهم وفطرتهم المستمدة من النيل .. وعلى فكرة لو هتقعدوا سوا انا معاكم و مش هأكسف وعازمكم على شاى - الدعوة مفتوحة - , انا نفسى بس حد يعزمنى على فيلم هى فوضى

Sara Swidan said...

مصطفى اسماعيل ...

مين دة اللي حرَّف أغنية شبابيك؟
مـــــيــــــــــن؟؟

ربنا يخليك يا مصطفى ، مبسوطة جداً إن البلوج عاجبك وحياة ربنا..

احفظ ف الأغاني ، ... و لو تعرف واحد أسمر (اسود) طبَّال ... تبقى عملت اللي عليك..

كررها

Sara Swidan said...

Foxology...

شكراً يا فوكسو ..
دة فعلاً اللي شاغلني .

ها؟؟

هتعملها معانل لو عملناها؟

Sara Swidan said...

The Alien ...

شكراً ربنا يخليك ..
أنا عارفة مدى سهولته ..

بس إيه؟؟
أنا قلت أول خطوة لتحقيقه .. إني أبوح بيه أولاً ..

يمكن ربنا يوعدني بواحد منسق أمسيات ولا حاجة!!

:)

نوَّرتني ..
كررها

Sara Swidan said...

حازم سويلم ...

لو اتعملت يا حازم ..

إنت أول واحد حتعرف..
وعد!

لو ع الفيلم ... دة أسهل من أي أمسية غنائية...

Moustafa` said...

ياااه
بقالى كتير ما دخلتش ع البلوج ده من آخر بوست اللى هو امتحانات
ع العموم بقالى يويمن عمال ادعبس ع اللنك اصل كنت ضايفه فى المفضله عندى بس المسخه ضربت وبتاع..مش عارف ايه اللى بيخلينى ارغى هنا ..بس ممكن حاسس انو بيت ظريف باخد فيه راحتى
ع العموم قريت طبعى البوستات كلها كالعاده
وعجبنى جدا الحلمين والأحلى منهم الخاطره بتاعه العصافير رغم انى معترض على فكره الاغانى اصلا ومش بحب اسمعها
ويااه لما بشوف واحد مشغل موبايل ولا بركب فى تاكسى مشغلها بتنطط جنبها لحد ما يقفلها ويأما يشغل قرآن يا اما يسيبنى اقرا ف سلام
ع العموم الجزء بتاع الشطرنج ضايقنى لأنى بحبه بس فكره الرصه والملك والملكه والترحيب بالطرف التانى جميله جدا
وده اساسا لأنك مش بتحبى الغدر والمكر بتحبى التضحيه وفى تشبيه لطيف قوى كده فىاخر سطرين بس مش فكره
بيدل على العطاء ف الحب يعنى
البوست ده انا طبعا مسمعتش الأغنيه ..بس واضح انها بتخلقلك جو خاص بتبدعى فيه
ربنا يهيدكى لطرق الصلاح
وهمسه عابره كده قبل ما امشى:صلاه المرأه فى بيتها أفضل يعنى والبيتوتيه هنا لذيذه
وياريت تحافظى على الظهر ف الكليه وبالطرحه بتاعتك انتى
ربنا معاكى
هضيفك تانى
سلاموو

With Myself said...

الأمسية الغنائية أنا جربتها قبل كده كذا مرة علي قهاوي وسط البلد ، بس ما بتبقاش بالطريقة دي ياسارة..

بيبقي في واحد معاه عود -في الأغلب- وبيبتدي يغني واحنا بندندن معاه ، اللي مش هانساها فعلاً كان شخص غير معروف كان علي قهو ةالفيشاوي في الحسين وكلنا اتلمينا عليه من غير ما نعرفه وكان بيغني لسه فاكر لأم كلثوم ، الشيء الغريب أنه ما كانش عايز فلوس ولا كان عايز أي حاجة!
كل اللي كان عايزه أنه يغني وإحنا نتسطل بالمعني الحرفي معاه!

Shaker said...

نايس بوست يا سارة و اختيار موفق لاغنية بعشقها بشكل مجنون

Sara Swidan said...

sagittarus...

تعليقاتك ديماً طويلة و وافية جداً ..

مبسوطة جداً إنك مسجلني عندك كمان ، دي حاجة أفخر بيها .

شكراً على اهتمامك إنك تيجي كل فترة تعرف أنا كتبت إيه ..

بجد مش عارفة أقولك إيه

شكراً على اهتمامك

Sara Swidan said...

With Myself ...

آه هي نفسي تبقى حاجة كدة ..

تطوع لبعثرة البهجة المجانية ع الناس يعني

Sara Swidan said...

L-o-N-e-Ly ...

صحيح؟؟

أنا كمان بحبها جداً ..

بصرة ..
مبسوطة جداً بالصدفة التحفة دي

CoOl GuY said...

ana msh 3ayez a3ala2 3ala el post bs 3ala el sora awel mara ashoufha bs 7elwa awy enty 3arfa ra2y msh fel sora bs :P w fy el 2asl bs gamda u rocks

Foxology said...

انا اول اللى هيغنى يا سارة انا بعشق منير وخصوصا الأغانى القديمة زى (عصفور ) وغيرها وغيرها

:)

Sara Swidan said...
This comment has been removed by the author.
Anonymous said...

Yahh, Mohamed Monier fares a7lamy
fi wa7ed bel mawsfat di w el a7sas deh delw2ty

Teftkereh 7al2eh ya sara:D
o3'nayet 3afor ma2sra feky awyy

Sara Swidan said...

Islam ...

ميرسي يا اسلام ربنا يخليك ..

عارفة إنك أول مرة تشوفها. الحمد لله إنها عجبتك ..

Sara Swidan said...

Foxology ...

بص .. أنا ماعرفش القديم و الجديد إيه..

بس بيتهيألي في أغاني جديدة .. ليها وقع أغاني محمد فؤاد ع الودان ..

و دي حاجة .. مش عايزة أقول ..

لا تليق..

Sara Swidan said...

Psycho...

يا أختي العزيزة ..

الايما أهم شيء ف البحث عن الحقائق .. بس ماتؤمنيش أوي لتتكعبلي تتكفي على وشك ، تتعمي..

ترشقي ف واحد ريكو خالص ولا حاجة ..

هة؟ معايا؟

و ماتحسسينيش إننا ف 2134 بنتكلم عن العملاق الراحل "إلفيس" .. أقصد "محمد منير" ..

هوة موجود فعلاً ..

يتنيلوا الرجالة يتعلموا منو .. بدل ما يعملوا فيها ديفرانت

أنا عربي said...

أنا عايز أقعد ف القعدة دي لو أمكن!
على فكرة أول مرة أسمع أغنية 3alameya و عجبتني أوي.

واللي عاجبني أكتر روح القعدة نفسها..

Sara Swidan said...

أنا عربي ...

إيدي على كتفك يابو العربي..

مبسوطة جداً إن اغنية عالمية عجبتك . هي أغنية جميلة فعلاً..

نوَّرتني ..

كررها

vision said...

ساره بجد انا عايزه اغنية عصفور دى اجيبها منين من ساعة ما سمعتها وانا مهوسه بيها

Sara Swidan said...

camera_girl ...

من عينيا يا بنتي..

اللينك أهي :
http://www.mp3hat.com/site/albums.php?al_id=985&ar_id=940

سبتهالك ع البلوج عندك هناك كمان ..

نزليها و ادعيلي..

ادعــــيـــــلــــي !

شرَّفتيني و الله

vision said...

عاااااااااااااااااا يا ساره مش شغال اللينك ولا السايت نفسو...انا مفيش حل غير انى اسمع الأغنيه من عندك لحد ما ربنا يفرجها....انا بأه اشطر منك وقريت البوست والبوستات الى فاتت...وطبيعى عارفه رأيى فالمكان هنا بصفه عامه.....تعبتك معايا ونورتينى هناك بأهتمامك سلااحف يا بطوطه

اسامة يس said...

جميل اوي تصميم المدونة فيه روح فنيه عاليه جداً...
جميل البوست جداً
منير اكثر من رائع
اختيارك اكثر من رائع...
دمت بكل ود.
.
خالص تحياتي

Sara Swidan said...

osama ...

كله بقضل شريف والله يا أسامة !

مبسوطة جداً إن الأغنية عجبتك ..

نوَّرتني

alzaher said...

على فكرة
منير عاملة حفلة رأس السنة في الأوبرا يوم 31
حاولي تيجي لو قدرتي إن شاء الله

أحمد سلامــة said...

كاميرا جيرل اكلتلي دماغي الصبح عشان الاغنية ربنا يسامحك يا سارة
:)
وبما ان مين احنا بقى دي مش مشكلة
فاحنا بنقعد كتير على فكرة

انا اخدت بالي ان الحلم الاول كان فيه دكتورة سحر حامل :) وسمر يزبك في فستان ابيض فضفاض
ربنا يكتر من احلامك الجميلة دي
سلامي

With Myself said...

alzaher:

الحفلة دي شكلها ها تبقي تجمع كبير للبلوجرز

في أكتر من مدون رايحين حفلة منير رأس السنة دي .

Sara Swidan said...

alzaher ...

آخ ياني ..
هوة دة اللي بنخده من التعليم !

عندي امتحانات يوم 30 ديسمبر يا عمرو ..

لكن شكراً لنشر الخبر ..

إنت هتروح؟؟

Sara Swidan said...

أحمد سلامــه ...

بيتهيألي يا أحمد هي ممكن تنزِّلها من الـ
box
هنا من عندي !

بيتهيألي يعني !!

و إزاي
mp3hat.com
مش بيشتغل ؟؟

Sara Swidan said...

With Myself ...

والله كان نفسي والله يا ولاد!

لكن خالتكم (اللي هي أنا) وراها شهادات

With Myself said...

ولا يهمك
كلنا كنا في المأزق ده أيام الكلية
الحمد لله ربنا تاب علينا دلوقت! :D

عقبالك ;)

Sara Swidan said...

With Myself...

أنا نسبياً بستمتع بالامتحانات .. بتحلو الدنيا و بحس إني عندي طاقة أعمل كل حاجة ف الدنيا ...

آسفة إني إتأخرت ف الرد

سعيد شحاتة said...

يا بنت يا المريلة كحلى
يا شمس هاللا وطاللا من أولى
........
نازل ع المزار أروى رحال الحى
........
المهم نغنى
دا جميل