Wednesday, January 23, 2008

حياة .. موشن .. احتفال


الحياة البعيدة المشتهاه !

تـمـثـَّـلـت ف كل حاجة . كـل حـاجـة . مابحبهاش ف حياتي .. أيام امتحاناتي .

أظن أنا قلت قبل كدة إني بحس إن الحياة بتحلو جداً ف الامتحانات . بحس إني عايزة أعمل أي حاجة . و عندي طاقة تحرَّك جبل . يا نهار أبيض !
(بالاضافة إني بحب الحاجات الجماعية .. المعاناة أو المتعة . أي حاجة تبقى عامل مشترك بين البشر.زي الامتحانات كأزمة من الاأزمات)
و لو حسبت الأشياء الصغيرة جدا اللي عملتها أيام امتحاناتي .. حلاقي إن الأزمة الأدبية اللي كنت بمر بيها ، كان علاجها إني أنطحن و أترمي ف وش قطر الامتحانات ..

كتبت 3 قصص قصيرة من النوع اللي بيرضيني . اللي بكتبه بنفس فعلاُ . و أسيب المذاكرة و أكتب و بعدين أدخل أنام . و زي الطفلة أصحى أول حاجة أعملها ، إني أقرا القصة تاني . فرحانة بيها .

وحشني أوي البلوج .
كنت بزوره من وقت للتاني .. لكن زهقت منه .. نفس البوست ف كل مرة . إيه دة؟؟ مين الناس دي اللي فاتحة بلوجات عشان تركنها ، و تفقع الناس !

النوم كان مهم عندي الأيام اللي فاتت . و لازم يكون نوم لساعات قصيرة ، لكن يكون نوم هادي ، و مش مقلق . لكن الماوس و الكي بود كانو موضوع .. بينوَّروا الأوضة كلها و أنا نايمة . .. و عمري ما فكَّرت أفصلهم ، عشان اللي حيفتح الكمبيوتر بعدي حيتعب في توصيلهم تاني و حيضطر يفتحه و يقفله تاني . و بكدة طلعت بفكرة عظيمة . أحط الماوس في علبة الـ إم بي ثري .. و الكي بورد أطفي الـ نم لوك .. (إيه القرف دة ، الكلام الانجليزي لما يتكتب بالعربي بيبقى غبي . ياس آي كان دو .. وات كان آي دو فور يو !)
لكن ساعات كنت بنساه مفتوح . و بيجيلي منه أرق بقى .. أفضل أتأمل الزرار .. مستنياه يبربش زي عين القطة .. لكنه كان قطة مطقطقة مابتغفلش عني ..

و فضلت أفتكر ف الصور اللي أخذتها له ، بالكاميرا القديمة . الصورة اللي فوق ليست إلا موشن للزرار ف الضلمة . و لماعجبتني .. نوَّرت التلات زراير و فضلت أصوَّرهم بتنويعات من الموشن .
و هوة دة بالظبط اللي كان بيحصلي أيام المتحانات .. الحياة نفس الحياة . لكن أنا اللي بتحرَّك و أتشقلب ، فبشوفها كرنفالات و أشكال تانية.


إمتحاناتي خلصت ؟ آه

لكن الكرنفال لسة موجود .. لسة بحتفل ..

ف يا جماعة ..

يا أهل اسكندرية بالتحديد .. اللي يعرف أي حفلة ، معرض ، فيلم ، ندوة ، ورشة ... أي حاجة ..

أنتوا مسؤولين قدامي ، ..


وحياة أمي البلوج وحشني

(دة أول بوست أبعته ف 2008 مش كدة؟؟) .. دة أنا ضيَّعت فرص كتير والله

6 comments:

With Myself said...

حمد لله علي السلامة..
كفارة :D

Foxology said...

اولا حمد الله ع السلامة يا سارة من الغيبة الطويلة دى

ثانيا يارب تكون الأمتحانات كويسة وان شاء الله بالتوفيق والنجاح

ثالثا الحياة عبارة عن موشن كبيرة وكل واحد فينا عبارة عن موشن صغير جوة الموشن الكبير ده اللى هو الحياة

رابعا بأة ابقى اطفى النم لوك بليل عشان متلاقيش نفسك صحيتى فجأة ومفكرة انه عين قطة فوسفورية او كائن خرافى حاكم الأمتحانات والمود بتاعها بيعمل جو من الهرتلة ملوش مثيل

سلامز :)

Sara Swidan said...

With Myself...

ماشي .. رد بقى اللي بعمله فيك لما بتختفي ..

و لما إنت واخد بالك.. ما قلتليش ليه؟

Sara Swidan said...

Foxology...

ربنا يخليك يا فوكسو .. رجعت إزراي للـ
Account
بتاعك ؟؟

أنا قلت الناس زهقت مني بقى ، و خلاص حتبطل كمان تبعت تعليقات

CoOl GuY said...

hi sara glad that u r happy wish to see u alays happy and i really thrilled when i saw new post wished to be the first but u know busy life takes every one take care

Sara Swidan said...

Islam ...

ميرسي يا اسلام ..

ربنا يكرمك ..

تروح و ترجع بالسلامة